ट्रकची मागून जोरदार धडक; एकाचा जागीच मृत्यू..

नागपूर :-एका दैनिक पेपरच्या प्रेसमध्ये काम करणाऱ्या कामगाराच्या दुचाकीला काँक्रीट मिक्सर तयार करणाऱ्या ट्रकने मागून जोरदार धडक देत ट्रकचे पुढचे चाक आणि संपूर्ण वाहन शरीरावरून गेल्याने जागीच मृत्यू झाल्याची घटना आज,मंगळवार २७ जानेवारी रोजी सकाळच्या सुमारास एमआयडीसी पोलीस ठाण्याच्या हद्दीत घडली. अपघातात मधुकर नामदेव गोतमारे वय ५६ वर्षे असे मृत पावलेल्या कामगाराचे नाव असून ते गेल्या आठ वर्षांपासून दैनिक भास्कर प्रेसमध्ये काम करत होते.

मधुकर गोतमारे हे आज सकाळच्या सुमारास एमएच ४९ बीसी ०५९४ क्रमांकाच्या दुचाकीने कामावर जात असतांना जयताडा रोडवरील गुडलक सोसायटीजवळ वळण घेत असतांना मागून आलेल्या एमएच ४९ बीझेड ७१९९ क्रमांकाच्या काँक्रीट मिक्सर ट्रकने त्यांना चिरडले. यात गोतमारे हे जागीच गतप्राण झाले.घटना घडताच ट्रक चालक घटनास्थळावरून ट्रक ठेऊन पसार झाला. जागीच मृत्यू झाल्याने घटनास्थळी मोठी गर्दी जमली होती.पोलिसांना माहिती देण्यात आली.घटनेची माहिती मिळताच ठाणेदार गोकुळ महाजन,पीएसआय वैशाली सोळंके,कॉन्स्टेबल श्रेयस फलकाडे,रवींद्र नेतानराव,राजू खडतकर आणि ट्रॅफिक पोलीस निरीक्षक सारंग मिराशी यांच्यासह वरिष्ठ अधिकारी घटनास्थळी पोहोचले. पोलिसांच्या प्राथमिक तपासात अपघातग्रस्त ट्रक वाडी येथील अदानी प्लांटमधून काँक्रीट घेऊन जात असतांनाच सदरचा अपघात घडला.प्रकरणी पुढील तपास सुरू करण्यात आला आहे.