माहिती अधिकार अर्जाद्वारे मागितलेली माहिती देण्यास टाळाटाळ; ग्रामसेवकाला २५ हजाराचा दंड..

गोंदिया :-माहिती अधिकार अर्जाद्वारे मागितलेली माहिती हलक्यात घेणे ग्रामपंचायतीच्या ग्रामसेवकास चांगलीच महागात पडली आहे.माहिती देण्यास टाळाटाळ करणाऱ्या तत्कालीन ओ.एन.तुरकर  ग्रामसेवकाला राज्य माहिती आयोगाच्या नागपूर खंडपीठाने तब्बल २५ हजाराचा दंड ठोठावला असून सदरचा दंड शासकीय कोषागारात जमा करण्याचे निर्देश राज्य माहिती आयुक्तांनी गोंदिया पंचायत समितीच्या बीडीओंना दिले आहेत.राज्य माहिती आयुक्तांच्या निर्णयाने माहिती दडवणाऱ्या अधिकारी,कर्मचाऱ्यांना चांगलीच चपराक बसली आहे.

अधिक माहिती अशी की,गोंदिया तालुक्याच्या

एकोडी गावातील ग्रामस्थ नामदेव बिसेन यांनी एकोडी ग्रामपंचायतीअंतर्गत केलेल्या काही कामांची माहिती माहिती अधिकार अर्जाद्वारे ४ फेब्रुवारी २०२२ रोजी माहिती मागितली होती.त्यावेळेस,जनमाहिती अधिकारी तथा ग्रामसेवक तुरकर यांनी माहिती देण्याकडे दुर्लक्ष केले.त्यामुळे बिसेन यांनी प्रथम अपीलीय अधिकारी तथा बीडीओ यांच्याकडे प्रथम अपील दाखल केले.अपील दाखल केल्यानंतर आदेश काढण्यात आला.मात्र,सदर आदेशानुसार माहिती देण्याचे ग्रामसेवक यांच्याकडून टाळण्यात आल्याने बिसेन यांनी २० एप्रिल २०२२ रोजी राज्य माहिती आयोग खंडपीठ नागपूर यांच्याकडे द्वितीय अपील दाखल केले होते.त्यानुसार,यावर ९ डिसेंबर २०२५ रोजी खंडपीठात सुनावणी पार पडून आदेश काढण्यात आला.आदेशात तत्कालीन जन माहिती अधिकारी तुरकर यांना दोषी ठरवत २५ हजाराचा दंड ठोठावण्यात आला.महत्वाचे म्हणजे,माहिती अधिकार कायद्यातील पायऱ्या संथगतीने चालत असल्या तरीही काही प्रकरणात आता न्याय मिळू लागल्याने काहींनी समाधान व्यक्त केले आहे.