हाय सिक्युरिटी रजिस्ट्रेशन नंबर प्लेट लावण्यासाठी पाचव्यांदा मुदतवाढ..

उद्रेक न्युज वृत्त :- ‘हाय सिक्युरिटी रजिस्ट्रेशन प्लेट’ (एचएसआरपी)बसवण्याची आज,रविवार ३० नोव्हेंबर संपणारी अंतिम मुदत राज्य परिवहन विभागाने पुन्हा एकदा वाढवली आहे.सदरची मुदत आता ३१ डिसेंबर २०२५ पर्यंत देण्यात आली आहे.विशेष म्हणजे,ही मुदतवाढ देण्याची पाचवी वेळ आहे,ज्यामागे राज्यातील स्थानिक स्वराज्य संस्थांच्या निवडणुकांचे कारण पुढे करण्यात आले आहे.परिवहन विभागाकडून वारंवार मुदतवाढ दिली जात आहे.मात्र,हाय सिक्युरिटी रजिस्ट्रेशन नंबर प्लेट लावण्यासाठी अनेकजण कुचराई करतांना दिसून येत आहेत.अश्यातच ३१ डिसेंबर नंतर मुदतवाढ मिळण्याची शक्यता कमी आहे.दुचाकी, चारचाकी वाहनांवर ‘एचएसआरपी’ नसेल तर १ जानेवारीपासून कारवाईला सामोरे जावे लागेल.पहिल्या गुन्ह्यात ५०० रुपये,तर दुसऱ्या गुन्ह्यात दीड हजार रुपये दंड आकारला जाणार आहे.दंड आणि त्रासापासून वाचण्यासाठी तातडीने transport.maharashtra.gov.in या शासकीय संकेतस्थळावर जाऊन ‘एचएसआरपी’ बसवण्यासाठी ऑनलाइन अर्ज करण्याचे आवाहन परिवहन विभागाच्या वतीने करण्यात आले आहे.