पाच मित्र तलाव परिसरात फिरायला गेले अन् दोघेजण बुडाले..!

नागपूर :-तलाव परिसरात पाच मित्र फिरायला गेले,पण त्यातील दोघेजण पाण्यात उतरताच ओरडू लागल्याने तिघांची घाबरगुंडी झाली.अश्यातच आरडाओरड केल्याने स्थानिक नागरिकांनी धाव घेत घटनेची माहिती पोलिसांना दिली.त्यानुसार दोघांचा तलावात बुडून मृत्यू झाल्याचे काल,शनिवारी पाच वाजेच्या सुमारास उघडकीस आले.सदरची घटना नागपूरच्या गोरेवाडा तलाव परिसरात घडली.यात १८ वर्षीय सतीश रामराज देशभ्रतार आणि १८ वर्षीय अनिकेत धनराज बडगे दोघेही भद्रशीला बुद्ध‌विहाराजवळ,टीव्ही टॉवर, मानवतानगर,नागपूर येथील रहिवासी असून दोघांचाही तलावात बुडून मृत्यू झाला.सतीश हा पेंटिंगचे काम करायचा व त्याचे वडील ई-रिक्षा चालवतात तर अनिकेत हा एका खाजगी रुग्णालयात काम करीत होता.

माहितीनुसार,सतीश देशभ्रतार,अनिकेत बडगे,२१ वर्षीय साहिल चौरे,१७ वर्षीय यश उके आणि १३ वर्षीय कुणाल उके हे पाच मित्र काल शनिवारी दुपारच्या सुमारास नागपूरच्या गोरेवाडा तलाव परिसरात फिरायला गेले होते.त्यातच तिघेजण तलावाच्या काठावर सेल्फी काढत होते.तर सतीश आणि अनिकेत हे तलावात पोहण्यासाठी उतरले.पोहता-पोहता दोघेही खोल पाण्यात गेल्याने गटांगळ्या खात ओरडू लागले.त्यामुळे साहिल चौरे, यश उके आणि कुणाल उके हे तिघेही घाबरले.घाबरतच तिघेही तलाव परिसराच्या बाहेर निघून याबाबत नागरिकांना माहिती दिली.काही नागरिकांनी याबाबत गिट्टीखदान पोलिसांना कळविले.

गिट्टीखदान ठाण्याचे वरिष्ठ पोलिस निरीक्षक कैलाश देशमाने ताफ्यासह घटनास्थळी पोहोचले.सायंकाळी सहा वाजेच्या सुमारास महापालिकेच्या अग्निशमन विभागाला सूचना दिली.सिव्हिल लाईन्सच्या अग्निशमन विभागाचे वाहन घटनास्थळी पोहोचल्यानंतर अग्निशमन दलाच्या जवानांनी बोटीच्या मदतीने शोधमोहीम सुरू केली. दरम्यान,अग्निशमन विभागाने रात्री उशिरापर्यंत शोध घेतला असता,रात्री ११ वाजताच्या सुमारास सतीशचा मृतदेह सापडला.रात्र झाल्याने शोधमोहीम थांबविण्यात आली व परत आज,रविवार शोधमोहीम राबवली असता सकाळच्या सुमारास अनिकेतचा मृतदेह सापडला.घटनेने मानवतानगरात शोककळा पसरली आहे.