ट्युशनला जाते सांगून १५ वर्षीय अल्पवयीन मुलीने घर सोडले अन् पैसे कमविण्यासाठी थेट पोहोचली नेपाळला…

नागपूर :-आजच्या दगदगीच्या जीवन शैलीत पैश्याला इतके महत्व आलेत की,काहीजण पैश्यासाठी वाट्टेल ते करायला तयार असतात.आपल्या नजरेसमोर एखादा छानसे कपडे वा इतर साहित्य खरेदी करीत असेल तर आपलीही इच्छा महागडी वस्तू वा इतर साहित्य खरेदी करण्याची होत असते.मात्र,त्यासाठी आपल्याकडे पैसा असणे गरजेचे आहे.अन्यथा आपल्या स्वप्नाचा चुराडा झाल्याशिवाय राहणार नाही.अश्यातच काहींच्या घरची परिस्थिती बेताचीच असते.त्यामुळे अनेकजण पैसे कमविण्याचा विचार करून स्वप्ने पूर्ण करण्याचा प्रयत्न करीत असतात.अश्याच प्रकारे नागपुरातील एका अल्पवयीन १५ वर्षाच्या मुलीने ट्युशनला जाते सांगून,घर सोडून चक्क पैसे कमविण्यासाठी थेट नेपाळला गेल्याचा प्रकार उघडकीस आला आहे.पोलिसांनी मध्य प्रदेश,बिहार या राज्यांतील शेकडो सीसीटीव्ही फुटेजेस तपासल्यानंतर नेपाळमध्ये जाऊन तिचा शोध लावला व तिला पालकांच्या हवाली केले.कळमना पोलिस ठाण्याच्या पथकाने ही कारवाई केली.संबंधित १५ वर्षीय अल्पवयीन मुलगी ही शिक्षण घेत आहे.तिच्या घरची स्थिती हलाखीचीच आहे.इतर मैत्रिणींना पाहून तिलादेखील आपल्याकडे पैसे असावेत,असे वाटत होते.नेपाळमध्ये कमी वेळात जास्त पैसे मिळू शकतात, अशी तिला माहिती मिळाली.त्यावरून तिने २ मे रोजी घर सोडले.घरातून निघतांना तिने ट्युशनला जाते,असे सांगितले होते.बराच वेळ झाला तरी ती घरी न आल्याने घरच्यांनी अखेर पोलिस ठाण्यात तक्रार दिली होती.पोलिसांनी गुन्हा दाखल करत तिचा शोध सुरू केला होता.पोलिसांनी विविध परिसरातील सीसीटीव्ही तपासले असता ती रेल्वेस्थानकावर गेल्याचे कळाले.तेथून ती रेल्वेने तिरोडी,मध्य प्रदेशात पोहोचल्याची बाब स्पष्ट झाली.पोलिसांचे पथक तिरोडीला गेले व तेथील सीसीटीव्ही फुटेज तपासले.तेथून ती मुलगी बिहारमधील पटना रेल्वेस्थानकावर गेली आणि बसने नेपाळ सीमेवरील बिट्टामोर येथे गेल्याची बाब सीसीटीव्हीतून समोर आली.पोलिसांचे पथक तेथे पोहोचले.तेथेदेखील पोलिसांनी सीसीटीव्हीतून शोध घेतला. तसेच परिसरात तिचा फोटो दाखवून विचारणा केली. ती मुलगी सीताबढी बसने गेल्याचे कळाले.पोलिसांनी त्या हिशेबाने शोध सुरू केला व ती नेपाळमधील जनकपूर येथील रहिवासी महिला देवी विनोद पाठककडे असल्याची माहिती मिळाली.पोलिस तेथे गेले असता,ती मुलगी महिलेकडेच होती.पोलिसांनी तिला ताब्यात घेऊन समुपदेशन केले.मुलीला जनकपूरमधून नागपुरात आणून तिच्या पालकांच्या स्वाधीन करण्यात आले.सदरची कारवाई वरिष्ठ पोलिस निरीक्षक प्रवीण काळे,दत्ता घुगल,संजय राठोड,उमरबेग मिर्झा यांच्या पथकाने केली.