वडिलाने पोटगी थकवली; मुलाने उच्च न्यायालयात धाव घेताच दणका..!

नागपूर :-आई नोकरीवर,मात्र तुटपुंज्या पगारातून मुलाचे पालन-पोषण करण्यास अडचणींचा सामना करावा लागत असल्याने मुलाने ७० हजार रुपये वेतन असलेल्या वडिलांकडे पोटगी मागितली.न्यायालयाने पोटगी मंजूर करूनही पोटगीची रक्कम देण्यास टाळाटाळ करणाऱ्या बापास मुंबई उच्च न्यायालयाच्या नागपूर खंडपीठाचा दणका बसल्यानंतर मुजोर बाप सुतासारखा सरळ झाला.त्याने मुलाची ३ लाख १२ हजार रुपयांची पोटगी थकवली होती.ही रक्कम तो आता २५ हजार रुपये मासिक हप्त्याप्रमाणे मुलाला देणार आहे. याशिवाय,न्यायालयाने मुलाच्या शिक्षणाचा खर्चदेखील अदा करण्याचे निर्देश बापाला दिले आहेत.

मुलाच्या आई-बापाने कौटुंबिक वादामुळे आपसी सहमतीने घटस्फोट घेतला आहे.बाप सहाय्यक शिक्षक असून,तो नरखेड येथील रहिवासी आहे.त्याला ७० हजार रुपये मासिक वेतन मिळते; परंतु त्याने मुलाच्या पालनपोषण व शिक्षणाची काहीच सोय केली नव्हती. आईला तुटपुंजा वेतनातून मुलाची देखभाल करणे कठीण जात होते.मुलाने पोटगीकरिता सुरुवातीला कुटुंब न्यायालयात अर्ज दाखल केला होता.कुटुंब न्यायालयाने त्याला पाच हजार रुपये पोटगी मंजूर केली होती.मुलाला हा निर्णय मंजूर नव्हता.त्यामुळे त्याने उच्च न्यायालयात याचिका दाखल करून पोटगी वाढवून मागितली होती.उच्च न्यायालयाने ती याचिका मंजूर करून ऑक्टोंबर-२०१५ पासून संबंधित वाढीव पोटगी मंजूर केली होती.परिणामी,१३ ऑक्टोंबर २०२१ रोजी उच्च न्यायालयाने मुलाला ७ हजार ५०० रुपये मासिक पोटगी अदा करा,असा आदेश बापाला दिला होता.बापाने मुजोरी दाखवून त्या आदेशाचे पालनच केले नाही. त्यामुळे मुलाने उच्च न्यायालयात अवमान याचिका दाखल केली होती.त्या याचिकेवरील सुनावणीलाही बाप हजर राहत नव्हता.करिता,न्यायालयाने त्याच्याविरुद्ध जामीनपात्र अटक वॉरंट जारी केले होते.या दणक्यानंतर बापाने न्यायालयात हजर होऊन मुलाला थकीत पोटगी देण्याची ग्वाही दिली.प्रकरणावर न्यायमूर्तीद्वय नितीन सूर्यवंशी व प्रवीण पाटील यांच्यासमक्ष सुनावणी झाली. मुलाच्या वतीने ॲड.अमृता गुप्ता यांनी बाजू मांडली.