४५ वर्षीय मुख्याध्यापकाचे अल्पवयीन शाळकरी मुलींसोबत अश्लील कृत्य.. – भामरागड तालुक्याच्या जिल्हा परिषद प्राथमिक शाळेतील प्रकार..

गडचिरोली :-भामरागड तालुक्याच्या कुक्कामेट्टा

जिल्हा परिषद प्राथमिक शाळेतील अल्पवयीन शाळकरी मुलींसोबत चक्क शाळेतील मुख्याध्यापकानेच अश्लील कृत्य केल्याची घटना उघडकीस आल्याने जिल्ह्याच्या शिक्षण क्षेत्रात एकच खळबळ उडाली आहे.प्रकरणी मुख्याध्यापकावर विविध कलमान्वये गुन्हा दाखल करून भामरागड पोलीसांनी अटक केली आहे.रविंद्र उष्टुजी गव्हारे वय ४५ वर्षे,रा.ता.भामरागड,जि.गडचिरोली असे अटक करण्यात आलेल्या आरोपी मुख्याध्यापकाचे नाव आहे.

माहितीनुसार,गडचिरोली जिल्ह्याच्या भामरागड तालुक्यातील जिल्हा परिषद प्राथमिक शाळा कुक्कामेट्टा येथे रविंद्र गव्हारे बऱ्याच कालावधीपासून मुख्याध्यापक पदावर कार्यरत आहे.त्यातच काही दिवसांपासून तो शाळेतील चिमुकल्या मुलींशी अश्लील कृत्य करीत होता.भीतीपोटी मुलींनी याची वाच्यता कुणाकडेही केली नाही.अशातच दोन पिडीत चिमुकल्यांनी शाळेत जाण्यास नकार दिला.त्यामुळे घरच्यांनी धास्तावलेल्या मुलींना शाळेत न जाण्याचे कारण विचारले असता,शाळेचे मुख्याध्यापक रविंद्र गव्हारे हे शाळेतील कार्यालयात कुणीही नसल्याची संधी साधून कुठल्याही बहाण्याने बोलावून वेळोवेळी अश्लील कृत्य करून याची वाच्यता केल्यास मारण्याची व शाळेतून काढण्याची धमकी देत असतात,असे पालकांना पीडितांनी सांगितले.त्यामुळे दोन पिडीत चिमुकल्यांनी शाळेत जाण्यास नकार दिला होता.सदर पालकांनी शाळेतील इतर मुलींच्या घरी जाऊन याबाबत माहिती घेतली असता,सदर प्रकार उजेडात आला.पालकांनी काल,बुधवारी ५ मार्चला भामरागड उपविभाग अंतर्गत येणाऱ्या उप-पोलीस स्टेशन लाहेरीच्या ठाण्यात मुख्याध्यापकाविरोधात तक्रार दाखल केली.त्यानुसार पोलीसांनी जिल्हा परिषद प्राथमिक शाळा कुक्कामेट्टाचे मुख्याध्यापक रविंद्र उष्टुजी गव्हारे विरुध्द कलम ७४,७५(२), ३५१(२)(३) भारतीय न्याय संहिता सहकलम ८,१०, १२,पोक्सो अधिनियम सहकलम ३ (१) (डब्लु) (i) (ii),३ (२) (Va) अनुसूचित जाती-जमाती कायदा अन्वये गुन्हा नोंद करुन अटक केली आहे.