हृदय हेलावणारी आजची घटना..! नवविवाहित युवकाने नववधूच्या मांडीवर डोके टेकत सोडला प्राण..

गडचिरोली :-जिल्ह्याच्या अतिदुर्गम,आदिवासीबहुल भागातील कोरची तालुक्याच्या गहाणेगाटा गावात

हृदयाला हेलावणारी घटना आज,शनिवार ३ मे रोजी घडली.नुकतेच तीन दिवसांपूर्वीच लग्न झालेल्या एका २६ वर्षीय नवविवाहित युवकाची अचानकपणे प्रकृती बिघडली.अशातच रुग्णालयात उपचारासाठी जात असतांना वाटेतच नववधूच्या मांडीवर डोके टेकत  प्राण सोडल्याने नववधूने एकच हंबरडा फोडला.नारायण कंवलसिंह बोगा रा.गहाणेगाटा,ता.कोरची,जि.गडचिरोली असे मृत्यू झालेल्या नवविवाहित युवकाचे नाव आहे.

नारायण बोगा याचे नुकतेच बुधवार ३० एप्रिल रोजी दीपिका फिरुराम कुमेटी (रा.माधोपूर,ता.मानपूर-चौकी, छत्तीसगड)हिच्याशी विवाह झाला होता.याच दिवशी त्याच्या पोटात दुखु लागले.मात्र,त्याने त्याकडे दुर्लक्ष केले.परत दुसऱ्या दिवशी म्हणजेच रिसेप्शनच्या दिवशी गुरुवार १ मे ला पोटात कसेतरी वाटत असल्याने नजीकच्या खासगी रुग्णालयात जाऊन उपचार घेतले. त्यामुळे काहीकाळ बरे वाटले.त्यातच आज शनिवारी परत नारायणच्या पोटात दुखु लागल्याने नववधू व त्याचा मित्र तिघेही दुचाकीने रुग्णालयात जाण्यास निघाले. अशातच वाटेतच कसेतरी वाटू लागल्याने बोरी गावाजवळ दुचाकी थांबवून नारायणने नववधूच्या मांडीवर डोका टेकला. डोका टेकताच नारायणने प्राण सोडला.मित्र व नववधूने आवाज देवून हलवून बघितले असता नारायणने कुठलाही प्रतिसाद न दिला नाही. त्यातच नारायणच्या आईला बातमी कळताच तिचे काळीज फाटल्यासारखे झाले.कारण १५ वर्षांपूर्वी नारायणच्या वडिलांचे निधन झाले होते.आईने काबाडकष्ट करुन नारायणला लहानाचे मोठे केले होते. आई आणि नारायण हे दोघेच राहायचे. हृदय हेलावणारी घटना घडल्याने घटनेने अख्खे गाव हळहळले.