शेतकरी बांधवांना बियाणे सवलतीच्या दराने उपलब्ध.. – ऑनलाईन अर्ज करून लाभ घेण्याचे आवाहन..

गडचिरोली :-अन्न आणि पोषण सुरक्षा अन्नधान्य पिके व राष्ट्रीय खाद्य तेल अभियान गळीतधान्य पिके सन २०२४-२५ अंतर्गत रब्बी हंगामामध्ये पीक प्रात्यक्षिके तसेच प्रमाणित बियाणे वितरण या बाबींचे नियोजन करण्यात आलेले आहे.याकरिता चालू वर्षी हरभरा, जवस,करडई,भूईमुंग व मोहरी,तीळ या पिकांचे महाडीबीटी प्रणालीद्वारे बियाणे या घटकासाठी अर्ज स्विकारण्यात येणार आहेत.पीक प्रात्यक्षिके ही बाब शेतकरी गटामार्फत राबविली जाणार आहेत.

पीक प्रात्यक्षिकासाठी एका शेतकऱ्याला एक एकर मर्यादेत निविष्ठा स्वरूपात अनुदान उपलब्ध करून दिले जाणार आहे.प्रमाणित बियाणे वितरणासाठी एका शेतकऱ्याला आवश्यक असणाऱ्या बियाण्याचा २ हेक्टर मर्यादेत लाभ देय असणार आहे.या निविष्ठांचा पुरवठा करण्याकरिता लाभार्थ्याची निवड महाडीबीटी पोर्टलवर केलेल्या अर्जातून ऑनलाईन पद्धतीने करण्यात येणार आहे.त्यासाठी महाडीबीटी पोर्टलवर २८ सप्टेंबर २०२४ ते दिनांक १० ऑक्टोंबर २०२४ पर्यंत बियाणे,औषधे व खते या साठी शेतकऱ्यांना अर्ज करता येतील.तरी जास्तीत जास्त शेतकरी बांधवांनी mahadbt.maharashtra.gov.in या वेबसाईट वर जाऊन ऑनलाईन अर्ज करावेत व योजनेचा लाभ घ्यावा; असे आवाहन  जिल्हा अधीक्षक कृषि अधिकारी प्रिती हिरळकर यांनी केले आहे.