वळण मार्गावर कारची समोरासमोर धडक; एकाचा जागीच मृत्यू..

गडचिरोली :-वळण मार्गावर दोन कार एकमेकींना धडकून झालेल्या अपघातात एका शालेय विद्यार्थ्याचा जागीच मृत्यू झाला,तर एक महिला गंभीर जखमी झाल्याची घटना आज,रविवार २५ जानेवारी रोजी दुपारी दीड वाजेच्या सुमारास गडचिरोली जिल्ह्याच्या धानोरा तालुक्यातील धानोरा-मुरुमगाव मार्गावरील जपतलाई गावाजवळ घडली.अपघातात रोशन राजू किरंगे वय १२ वर्षे,रा.गोडलवाही,ता.धानोरा, जि.गडचिरोली याचा जागीच मृत्यू झाला असून तो गोंदिया जिल्ह्याच्या अर्जुनी मोरगाव तालुक्यातील येरंडी येथील मालिनीताई दहिवडे अनुदानित आश्रम शाळेचा विद्यार्थी होता.तर दुसऱ्या कारमधील निधी गुप्ता वय ४३ वर्षे,रा.मोहला,छत्तीसगड असे गंभीर जखमी महिलेचे नाव आहे.

उद्याच्या २६ जानेवारीच्या सांस्कृतिक कार्यक्रमासाठी आश्रम शाळेतील विद्यार्थ्यांच्या पालकांना घेऊन जाण्यासाठी स्कॉर्पिओ कार धानोरा तालुक्याच्या

जपतलाई मार्गे गोडलवाहीकडे निघाली होती.

जपतलाईच्या नागमोडी वळणावर जाताच धानोरा कडून सीजी ०४ पीजी ७८९६ क्रमांकाची टाटा कार स्कॉर्पिओला येऊन धडकली.धडक इतकी भीषण होती की,स्कॉर्पिओ कारचा सोरील भाग चेंदामेंदा होऊन कार पलटी झाली.तर टाटा कार रस्त्याच्या कडेला झाडाला जाऊन धडकली.अपघात घडताच मार्गावरून जाणाऱ्या नागरिकांनी घटनास्थळी धाव घेत पलटी झालेल्या स्कॉर्पिओ कार मधील जखमींना बाहेर काढण्यासाठी शर्थीचे प्रयत्न केले.मात्र,यात शालेय विद्यार्थ्याचा घटनास्थळीच मृत्यू झाला.तर टाटा कार मधील पती व मुलाला किरकोळ दुखापत झाली.मात्र,पत्नी निधी गुप्ता या गंभीर जखमी झाल्या.घटनेची माहिती मिळताच पोलिसांनी घटनास्थळ गाठत घटनेचा पंचनामा करून पुढील तपास सुरू केला आहे.