उद्रेक न्युज वृत्त
गडचिरोली : – जिल्ह्यातील चामोर्शी तालुका शहरामध्ये आज १० मार्च २०२३ रोजी बालविवाह होणार असल्याची गुपित माहिती चामोर्शी पोलीस ठाण्याचे पोलीस उपनिरीक्षक पल्लवी वाघ यांना मिळताच लगेच त्यांनी सदर घटनेची माहिती गडचिरोली जिल्हा बाल संरक्षण अधिकारी अविनाश गुरनुले यांना दिली.जिल्हा बाल संरक्षण व पोलीस पथक यांनी सदर बालविवाह रोखण्याकरीता विवाह स्थळास भेट देऊन बालविवाहास आळा घालण्यात आला.मुलाची व मुलीचे जन्म पुरावा तपासणी करून बालीका १८ वर्षाखालील आणि मुलगा २१ वर्षाखालील असल्याची खात्री पटल्यानंतर लगेच बालिकेचे व मुलाचे आणि कुटुंबाचे समुपदेशन करण्यात आले.
मुलीकडचे व मुलाकडचे दोन्ही मंडळी नागभिड तालुका जिल्हा चंद्रपूर येथील रहिवासी असून ते चामोर्शी शहरात फेब्रुवारी महिन्यात रोजगाराच्या शोधात कामाकरिता (भटकंती जमात) आले होते. एक दिवसा आधी त्यांनी हळदीचा कार्यक्रम पार पाडला आणि दुसऱ्या दिवशी सकाळी ११ वाजता वधू व वरांकडील नातेवाईक यांच्या उपस्थितीत बालविवाह चामोर्शी येथे होणार असल्याची गोपनीय माहिती मिळाली असल्याने त्यानुसार पोलीस विभाग, जिल्हा बाल संरक्षण कक्ष गडचिरोली यांनी सदर बालिकेच्या तात्पुरता स्वरूपात राहणाऱ्या ठिकाणी त्यांचे घर गाठून मुलीच्या आई वडिलांकडून मुलीचे १८ वर्ष व मुलाचे २१ वर्ष पूर्ण होइपर्यंत बालिकेचे विवाह करणार नाही.असे हमी पत्र लिहून घेतले व बालिकेचे व मुलाचे समुपदेशन करण्यात आले.
जिल्हा बाल संरक्षण अधिकारी अविनाश गुरणुले यांचे उपस्थितीत वधू पक्ष यांना एकत्र बसवून बालविवाह बाबतचे दुष्परिणाम व कायद्या नुसार होणारी कारवाई बाबत उपस्थित कुटूंबातील सदस्यांना माहिती देण्यात आली.
सदर कारवाई जिल्हा महिला व बाल विकास अधिकारी प्रकाश भांदककर यांच्या मार्गदर्शनाखाली जिल्हा बाल संरक्षण अधिकारी अविनाश गुरनुले, पोलीस स्टेशन चामोर्शीच्या पोलीस उपनिरीक्षक पल्लवी वाघ,बाल संरक्षण अधिकारी कवेश्वर लेनगुरे, पोलीस स्टेशन चामोर्शी येथील पोलीस जीवन हेडावू, सामाजीक कार्यकर्ते जयंत जथाडे,क्षेत्र कार्यकर्ता रविंद्र बंडावार यांनी कार्यवाही केली.
जिल्ह्यात कुठेही बालविवाह होत असल्यास जिल्हा बाल संरक्षण कक्ष येथे व चाइल्ड लाईन टोल फ्री नंबर १०९८ वर बाल विवाह बाबत संपर्क करावे;असे आवाहन कार्यालयाच्या वतीने करण्यात आले आहे.
