महायुती सरकार आज मांडणार विश्वासदर्शक ठराव…

मुंबई :-मुख्यमंत्री देवेंद्र फडणवीस यांच्या नेतृत्वाखालील महायुती सरकार आज सोमवारी ९ डिसेंबरला आपला विश्वासदर्शक ठराव मांडणार आहे. विधानसभा अध्यक्षांच्या निवडीनंतर विश्वासदर्शक ठराव सभागृहात मांडला जाणार आहे.दरम्यान,येत्या गुरुवार १२ डिसेंबरला राज्य मंत्रिमंडळाचा विस्तार होण्याची शक्यता आहे.

२८८ सदस्यांच्या सभागृहात महायुतीकडे तब्बल २३७ आमदारांचे बहुमत आहे.त्यामुळे विश्वासदर्शक ठराव संमत होणे,ही केवळ औपचारिकता राहिली आहे. विधानसभा अध्यक्षांच्या निवडीनंतर राज्यातील फडणवीस सरकारचा विश्वासदर्शक ठराव मांडला जाणार आहे.उदय सामंत,दिलीप वळसे पाटील,रवी राणा हे नियम २३ अन्वये मुख्यमंत्री देवेंद्र फडणवीस यांच्या मंत्रिमंडळावर विधानसभा पूर्ण विश्वास व्यक्त करीत असल्याचा प्रस्ताव मांडतील.महायुतीकडील भरभक्कम बहुमतामुळे आवाजी मतदानाने हा प्रस्ताव संमत केला जाण्याची शक्यता अधिक आहे.दरम्यान, विधिमंडळाचे हिवाळी अधिवेशन तोंडावर असल्याने येत्या गुरुवारी राज्य मंत्रिमंडळाचा विस्तार होण्याची दाट शक्यता आहे.