बनावट ग्राहकाने ‘ओके’ असा मॅसेज टाईप करताच देहव्यापार अड्ड्यावर पोलिसांचा छापा..

चंद्रपूर :-जिल्ह्याच्या ब्रम्हपुरी शहरातील फाशी चौक परिसरात चालवल्या जाणाऱ्या एका देहव्यापार अड्ड्यावर पोलिसांनी छापा टाकून एका पिडीत महिलेची सुटका केली,तर देहव्यापाराचा अड्डा चालवणाऱ्या पती-पत्नीवर ब्रम्हपुरी पोलीस ठाण्यात अनैतिक व्यापार प्रतिबंध अधिनियम १९५६ चे कलम ३,४,५ व ७ अन्वये गुन्हा दाखल करण्यात आला आहे.

प्रवीण अनिल भोयर वय ३६ वर्षे व त्याची ३४ वर्षीय पत्नी,रा.फाशी चौक,ब्रम्हपुरी,जि.चंद्रपूर अशी गुन्हा दाखल झालेल्या आरोपींची नावे आहेत.पोलिसांनी रोख रकमेसह मोबाईल व इतर साहित्य मिळून सुमारे  २३ हजार ८० रुपयांचा मुद्देमाल जप्त केला आहे.

ब्रम्हपुरी पोलिसांना मिळालेल्या गोपनीय माहितीच्या आधारे काल गुरुवारच्या सायंकाळी शहरातील फाशी चौक परिसरात सापळा रचण्यात आला.दरम्यान,पंच म्हणून दोन समाजसेविका महिलांना पाचारण करण्यात आले.त्यानंतर,एका बनावट ग्राहकास भोयर यांच्या घरी पाठवण्यात आले.ग्राहकाने काही वेळातच पाळत ठेवणाऱ्या पोलीस पथकास व्हॉट्सॲपवर ‘ओके’ असा मॅसेज टाईप करुन पाठवताच पोलिसांनी अड्ड्यावर छापा टाकला.छाप्यात उपस्थित महिला पोलीस कर्मचारी यांनी घेतलेल्या अंगझडतीत महिलेकडून पोलिसांनी बनावट ग्राहकाने दिलेल्या चिन्हांकित नोटा आणि १० हजार रुपये किंमतीचा विवो कंपनीचा मोबाईल जप्त केला.तसेच,खोलीतून इतर रोख रक्कम,रिअलमी कंपनीचा मोबाईल आणि आक्षेपार्ह साहित्य असा मुद्देमाल जप्त करण्यात आला.पोलीस तपासात, देहव्यापाराचा अड्डा प्रवीण भोयर व त्याची पत्नी हे दोघेही मिळून चालवायचे.पीडित महिलेस अर्धी रक्कम व स्वतः करीता अर्धी रक्कम ठेवायचे.देहव्यापारासाठी भोयर दाम्पत्य स्वतःच्या घराचा वापर करीत होते.हे विशेष.सदरची छापा कारवाई ब्रम्हपुरी पोलीस ठाण्याचे ठाणेदार प्रमोद बानबले,एपीआय मनोज खडसे, शितल खोब्रागडे,गुन्हे शाखा पथकातील कर्मचारी व ब्रम्हपुरी पोलीस प्रशासनाने केली.