नागपूर विमानतळावर पार्सलचा स्फोट; सुरक्षा यंत्रणेची उडाली तारांबळ…

नागपूर विमानतळावर पार्सलचा स्फोट; सुरक्षा यंत्रणेची उडाली तारांबळ…

नागपूर :-डॉ.बाबासाहेब आंबेडकर आंतरराष्ट्रीय नागपूर विमानतळावर एका पार्सलमधून जोरदार आवाज झाल्याने सुरक्षा यंत्रणेची चांगलीच तारांबळ उडाली.शुक्रवारी सायंकाळी हा खळबळजनक प्रकार घडला.पार्सलमध्ये फटाके होते,हे समजल्यानंतर सर्वांनी सुटकेचा निःश्वास सोडला.

अधिक माहिती अशी की,वाशिम येथील एका महिलेने तिच्या मुंबई येथे राहणाऱ्या भावाला एक पार्सल पाठवले.या पार्सलमध्ये शेतात पिकांची नासधूस करण्यासाठी येत असलेली जनावरे पळवून लावण्यासाठीचे फटाके होते.तिने एका खासगी कंपनीद्वारे पाठवलेले हे पार्सल तातडीने पाठवायचे असल्याने विमानाद्वारे ते पाठविण्याचा निर्णय झाला. संध्याकाळी साडेसहाच्या सुमारास मुंबईच्या एका फ्लाईटमधून हे पार्सल जाणार होते.मात्र,ठेवतांना पार्सल फुटले आणि त्यातीलच काही फटाके फुटल्याने जोरदार आवाज आला.यामुळे विमानतळ कार्गो परिसरात एकच खळबळ उडाली.सुरक्षा व्यवस्थाही सतर्क झाली.हिवाळी अधिवेशनाच्या तोंडावर हा प्रकार घडल्याने विमानतळ सुरक्षा व्यवस्थेवर प्रश्नचिन्ह निर्माण झाले.मात्र,यात धोकादायक असे काहीही नसल्याची माहिती वरिष्ठ पोलिस सूत्रांनी दिली.पुढील तपास सोनेगाव पोलिस करीत आहेत.