नक्षल चकमकीत शहीद जवानास शासकीय इतमामात मानवंदना..

गडचिरोली :-अबुजमाड जंगल परिसरात नक्षलवाद्यांविरोधात सुरू असलेल्या नक्षलविरोधी अभियानादरम्यान वीरगती प्राप्त झालेले सी-६० पथकाचे जवान(कमांडो)दीपक चिन्ना मडावी वय ३८ वर्षे,रा.मांड्रा-दामरंचा,ता.अहेरी,जि.गडचिरोली यांना आज,शुक्रवार ६ फेब्रुवारी रोजी गडचिरोली पोलीस मुख्यालयात शासकीय इतमामात मानवंदना देण्यात आली.हवेत बंदुकीच्या फैरी झाडून शहीद जवानास अंतिम सलामी देण्यात आली. पोलीस मुख्यालयाच्या प्रांगणात आयोजित श्रद्धांजली कार्यक्रमात नागपूरचे पोलीस आयुक्त रवींद्र कुमार सिंगल,पोलीस उपमहानिरीक्षक अंकित गोयल,केंद्रीय रिझर्व पुलिस बल उप महानिरीक्षक(परिचालन)अजय शर्मा,जिल्हा परिषदेचे मुख्य कार्यकारी अधिकारी सुहास गाडे,पोलीस अधीक्षक निलोत्पल,अप्पर जिल्हाधिकारी नितीन गावंडे यांच्यासह वरिष्ठ पोलीस अधिकारी, कर्मचारी व जवान मोठ्या संख्येने उपस्थित होते.सर्व मान्यवरांनी पुष्पचक्र अर्पण करून शहीद जवानास भावपूर्ण श्रद्धांजली वाहिली.

नक्षलविरोधी कारवाईदरम्यान कर्तव्य बजावत असतांना शहीद झालेले दीपक मडावी यांनी दिलेले सर्वोच्च बलिदान कधीही विसरले जाणार नाही,त्यांच्या कुटुंबीयांच्या दुःखात प्रशासन आणि पोलीस दल त्यांच्या पाठीशी उभे असल्याची भावना यावेळी व्यक्त करण्यात आली.मानवंदना कार्यक्रमानंतर शहीद दीपक चिन्ना मडावी यांचे पार्थिव अंतिम संस्कारासाठी अहेरी तालुक्यातील त्यांच्या मुळ गावी दामरंचा येथे रवाना करण्यात आले. मार्गक्रमणादरम्यानही पोलीस दलाच्या वतीने सन्मान राखण्यात आला.

अबुजमाड जंगल परिसरात काल शुक्रवारी नक्षलवाद्यांसोबत झालेल्या चकमकीत सी-६० कमांडो दीपक चिन्ना मडावी गंभीर जखमी झाले होते.त्यांना तातडीने हेलिकॉप्टरच्या माध्यमातून भामरागड येथे हलविण्यात आले.मात्र,उपचारादरम्यान झालेल्या गंभीर जखमांमुळे त्यांना वीरमरण आले.