दोन दिवसांपासून बेपत्ता असलेल्या व्यावसायिकाचा पुलाखाली पोत्यात बांधलेला आढळला मृतदेह..

नागपूर :-गेल्या दोन दिवसांपासून बेपत्ता असलेल्या एका व्यावसायिकाचा चक्क पोत्यात बांधलेला मृतदेह नागपुरातील नारा नदीच्या पुलाखालील नाल्याच्या कोरड्या भागात आढळून आल्याने परिसरात एकच खळबळ माजली आहे.सदरची घटना आज,बुधवार २२ एप्रिल रोजी नागपूर शहराच्या जरीपटका पोलीस ठाण्याच्या हद्दीत उघडकीस आली.परिसरातील स्थानिक नागरिकांना नाल्याच्या कोरड्या भागात संशयास्पद पोते दिसून आल्याने त्यांनी पोलिसांना माहिती दिली.त्यानंतर, जरीपटका पोलीस पथकासह घटनास्थळी दाखल होत संशयास्पद पोते उघडून पाहताच त्यात मृतदेह आढळून आला.घटनास्थळी सहाय्यक पोलीस आयुक्त सत्यवान बंडीवार यांनीही प्रत्यक्ष भेट देऊन पाहणी केली.प्राथमिक तपासात पोत्यात आढळून आलेला मृतदेह हा सुनिल साहू यांचा असल्याचे निष्पन्न झाले.साहू हे गेस्ट हाऊस व्यावसायिक होते.त्यातच,ते गेल्या दोन दिवसांपासून बेपत्ता असल्याने कुटुंबीयांनी नागपूरच्या सदर पोलीस ठाण्यात तक्रार नोंदवली होती.अश्यातच आज चक्क मृतदेह आढळून आल्याने हत्येचा संशय बळावला असून त्या दिशेने पोलीस तपास सुरू करण्यात आला आहे. दरम्यान,परिसरातील सीसीटीव्ही फुटेज तपासले जात असून अज्ञात मारेकऱ्यांचा पोलिसांकडून शोध सुरू करण्यात आला आहे.