उद्रेक न्युज वृत्त
मध्य प्रदेश :- मध्य प्रदेशातील शाजापूरमध्ये ड्रायव्हरला वादग्रस्त शब्द उच्चारणाऱ्या जिल्हाधिकारी किशोर कन्यालला अखेर शिक्षा झाली.या प्रकरणाची स्वतः मुख्यमंत्री डॉ. मोहन यादव यांनी दखल घेत या अधिकाऱ्याची पदावरून उचलबांगडी केली.कन्यालला पदावरून हटवण्यासोबतच मुख्यमंत्री म्हणाले, मी स्वतः गरिबाचा पुत्र आहे. आमचे सरकारही गरिबांसाठीच आहे. सरकारमध्ये सर्वांचा सन्मान झाला पाहिजे. यासोबतच त्यांनी राज्यातील उर्वरित अधिकाऱ्यांनाही त्यांच्या भाषेवर नियंत्रण ठेवण्याच्या सूचना दिल्या आहेत. किशोर कन्यालला पदावरून हटवल्यानंतर मध्य प्रदेश सरकारने रिजू बाफना यांना जिल्हाधिकारी बनवले आहे. दोन दिवसांपासून सुरू असलेल्या ट्रक चालकांच्या संपादरम्यान जिल्हाधिकारी किशोर कन्याल यांनी शाजापूरमध्ये एका ट्रक चालकाला खडसावले होते. या घटनेचा एक व्हिडीओही सोशल मीडियावर व्हायरल होत आहे.
जिल्हाधिकाऱ्यांनी मागितली माफी👇
व्हिडीओ व्हायरल झाल्यानंतर आणि सरकारने दखल घेतल्यानंतर जिल्हाधिकारी किशोर कन्याल यांनीही स्पष्टीकरण दिले.याबद्दल त्यांनी माफी मागितली होती.त्यांनी स्पष्टीकरण देताना सांगितले की, ट्रकचालकांसोबत झालेल्या बैठकीदरम्यान ही व्यक्ती कोणत्याही थराला जाण्याचे वारंवार सांगत होती. त्यामुळे त्याला शांत करण्यासाठी त्या शब्दात बोललो.कोणाच्याही भावना दुखावण्याचा त्यांचा हेतू नव्हता.
