उद्रेक न्युज वृत्त
कुरखेडा (गडचिरोली):-आधी गायीवर हल्ला, त्यानंतर तीन कोंबड्यांचा फडशा पाडून शेळ्यांची शिकार करण्यासाठी झेपावलेला बिबट्या विहिरीत कोसळला.सदरची घटना कुरखेडा तालुक्यातील जोशीटोला येथे काल,१६ जुलै रोजी पहाटे घडली. दरम्यान,बिबट्याला विहिरीबाहेर काढण्यासाठी वन विभाग कामाला लागला.
जोशीटोला गावात रघुनाथ बनसोड यांचे घर आहे.तेथेच त्यांची विहीर असून,जवळच गुरांचा गोठाही आहे.१६ जुलै रोजी पहाटे दोन वाजता बिबट्याने त्यांच्या गोठ्यातील गायीवर हल्ला केला.यात गाय जखमी झाली.त्यानंतर तीन कोंबड्यांचा फडशा पाडला.बिथरलेल्या बिबट्याने नंतर शेळ्यांवरही हल्ला करण्याचा प्रयत्न केला.मात्र,याचदरम्यान अंधारात तो विहिरीत कोसळला.पहाटे ही बाब शेतकरी बनसोड यांच्या निदर्शनास आल्यावर त्यांनी तातडीने वन विभागाला संपर्क केला.
सकाळी वन विभागाच्या अधिकाऱ्यांनी धाव घेतली. या घटनेने परिसरात दहशत निर्माण झाली आहे.दरम्यान,वन विभागाच्या कर्मचाऱ्यांनी बिबट्याला बाहेर काढण्यासाठी पिंजरा बोलावला.मात्र, विहिरीचा आकार अवघ्या चार फुटांचा आहे.त्यामुळे पिंजरा आत सोडणे कठीण बनले होते.बिबट्यासाठी लाकडी पाट सोडण्यात आला; पण तो पाइपला बिलगून बसला.नंतर छोटा पिंजरा मागवला.देसाईगंज येथील वन विभागाच्या बचाव पथकाने या विहिरीत पिंजरा सोडला व बिबट्या त्यात अलगद अडकला.त्यानंतर त्याची पशुवैद्यकीय डॉक्टरांमार्फत वैद्यकीय तपासणी करून नंतर त्यास नैसर्गिक अधिवासात सोडले जाणार आहे.
