तळेगावच्या इसमाची गळफास घेऊन आत्महत्या.. – कुरखेडा तालुक्यातील घटना..

कुरखेडा(गडचिरोली):-कुरखेडा तालुक्याच्या तळेगाव येथील एका ५० वर्षीय इसमाने घरी असलेल्या जांबाच्या झाडाला गळफास लावून आत्महत्या केल्याची घटना काल,रविवारी ८ जून रोजी सकाळी दहा वाजेच्या सुमारास घडली.दूधराम किसन मडावी,रा.तळेगाव, ता.कुरखेडा,जि.गडचिरोली असे आत्महत्या केलेल्या इसमाचे नाव आहे.दूधराम मडावी हे स्वतःचे चारचाकी वाहन चालवून संसाराचा गाडा हाकत होते.

माहितीनुसार,दूधराम मडावी यांच्याकडे स्वतःचे दोन चारचाकी वाहन असून घटनेच्या दिवशी ट्रॅव्हल्स सारखे असलेले एक वाहन बुकिंग होते.सकाळच्या सुमारास दूधराम यांनी वाहनाची सफाई करून बुकिंगवर जाण्याची संपूर्ण तयारी केली होती. अश्यातच सकाळी दहाच्या सुमारास त्यांनी अचानकपणे टोकाचे पाऊल उचलत घरी असलेल्या जांबाच्या झाडाला गळफास लावून जीवनयात्रा संपवली.सदरची घटना घरच्यांच्या लक्षात येताच कुटुंबीयांना मोठा हादरा बसला.घटनेची माहिती कुरखेडा पोलिसांना कळताच घटनास्थळी दाखल होत पंचनामा करीत कुटूंबीय व गावकऱ्यांच्या मदतीने गळफास घेतलेले प्रेत खाली उतरवुन कुरखेडा उपजिल्हा रुग्णालयात शवविच्छेदनासाठी नेण्यात आले.आत्महत्येचे कारण अद्याप समजू शकले नाही. घटनेचा पुढील तपास कुरखेडा पोलीस प्रशासन करीत आहे.दूधराम मडावी यांच्या पश्चात पत्नी व दोन मुले असा आप्त परिवार आहे.एक मुलगा शासकीय नोकरीवर असून दूधराम हे घरी असलेले वाहन स्वतःच चालवायचे.