उद्रेक न्युज वृत्त
एटापल्ली(गडचिरोली) :- तालुक्यातील हेडरी येथील आदिवासी विविध कार्यकारी सहकारी संस्थेत पणन हंगाम २०२२-२३ मध्ये धान खरेदी केलेल्या व्यवहारात तब्बल १ कोटी ३७ लाख रूपयांच्या धानाची तफावत आढळली.धानाच्या अफरातफर प्रकरणी सखोल चौकशीअंती आविका संस्थेचे अध्यक्ष,सचिव तसेच आदिवासी विकास महामंडळाच्या कर्मचाऱ्यांसह एकूण पाच जणांवर गुरुवारी आलदंडी पोलिस मदत केंद्रात गुन्हा दाखल करण्यात आला.
खरीप पणन हंगाम २०२२-२३ मध्ये हेडरी धान खरेदी केंद्रावर ६७१५.३३ क्विंटल म्हणजेच १२ हजार ९९८ पोती धानाचा साठा कमी आढळला.२०२४ रूपये प्रति क्विटल दराने १ कोटी ३६ लाख ९९ हजार १७३ रूपये २० पैसे,तसेच बारदान्याचे ४ लाख २५ हजार ८१४ रूपये ४८ पैसे,असे एकूण १ कोटी ३७ लाख २५ हजार ८७ रूपये ६८ पैसे एवढी तफावत आढळली. धानाच्या अफरातफर प्रकरणी १२ जानेवारीला आदिवासी विकास महामंडळ अहेरीचे उपप्रादेशिक व्यवस्थापक (उच्च श्रेणी) बी.एस.बरकमकर यांनी आलदंडी पोलिसांत तक्रार दिली.त्यानुसार आदिवासी विविध कार्यकारी सहकारी संस्थेचे अध्यक्ष सुधाकर सुकू पुंगाटी,सचिव किशोर पदा,केंद्र प्रमुख सुरेश पुंगाटी,मदतनीस प्रदीप दुर्गे तसेच आदिवासी विकास महामंडळ कार्यालय अहेरीच्या प्रभारी विपणन निरीक्षक सोनाली पेंदाम यांच्याविरोधात तक्रार दिली. तक्रारीवरून पाचही आरोपींविरोधात भादंवि कलम ४०६,४०९,४२०,३४ अन्वये गुन्हा दाखल करण्यात आला आहे.
