उद्रेक न्युज वृत्त
एटापल्ली(गडचिरोली) :- गडचिरोली जिल्ह्याच्या एटापल्ली तालुक्यातील हेडरी येथील लोहखनिजाच्या प्रकल्पात काम करणारे शेकडो कर्मचारी एटापल्ली येथे भाड्याने राहत असल्याने मागील दोन वर्षांत घरभाड्याचे दर चार पटीने वाढले आहेत तर अनेकांना घर भाड्याने मिळणे कठीण झाले आहे.
एटापल्ली हा नक्षलग्रस्त व जंगलव्याप्त तालुका आहे. त्यामुळे तालुक्यात कार्यरत असलेले कर्मचारी याच ठिकाणी राहून नोकरीच्या ठिकाणी ये-जा करतात.या कर्मचाऱ्यांची गरज लक्षात घेऊन काही नागरिकांनी घरे बांधली व ते भाड्याने देत होते.साधारणपणे तीन ते चार हजार रुपये भाडे आकारले जात होते; मात्र हेडरी येथे लोहखनिजाचे उत्खनन करण्याच्या कामाला सुरुवात झाल्यापासून या ठिकाणी काम करणाऱ्या बाहेर राज्यातील कर्मचाऱ्यांची संख्या वाढली आहे.या कर्मचाऱ्यांना ठेवण्यासाठी कंपनी घरमालक म्हणेलतेवढे भाडे देण्यास तयार होत आहे. जी खोली पूर्वी तीन ते चार हजार रुपयांना मिळत होती.आता त्याचे भाडे १२ हजार रुपयांच्यावर पोहोचले आहे.त्यामुळे याची झळ सर्वसामान्यांना बसत आहे.
