ट्रॅक्टर पलटून एकजण जागीच ठार तर दोघेजण गंभीर जखमी.. – कुरखेडाच्या वडेगाव मार्गावरील घटना..

कुरखेडा(गडचिरोली):-कुरखेडा तालुक्याच्या वडेगाव-ईळदा मार्गावरील वळणावर ट्रॅक्टर पलटून एकजण घटनास्थळीच ठार झाला,तर दोघेजण गंभीर जखमी झाल्याची घटना उघडकीस आली आहे. अपघातात २२ वर्षीय कृष्णा चिलाप हा जागीच ठार झाला.तर २४ वर्षीय रेवचंद भानूजी सहारे व २६ वर्षीय अंशूमन हिरालाल नाईक हे गंभीर जखमी झाले.मृतक आणि गंभीर जखमी झालेले गोंदिया जिल्ह्याच्या अर्जुनी-मोरगाव तालुक्यातील कोरंभीटोला येथील रहिवासी असून चौघेजण एमएच-३५ एडब्ल्यू-६२८४ क्रमाकांच्या ट्रॅक्टरने काल मंगळवारी सकाळच्या सुमारास कोरंभीटोला येथून वडेगाव मार्गे सिमेंट विटा भरून कुरखेडा तालुक्यातील बांधगाव येथे जात होते.दरम्यान,ईळदा वरून काही अंतरावर असलेल्या वडेगाव मार्गावरील वळणावर येताच भरधाव वेगात असणारा ट्रॅक्टर अनियंत्रित होऊन पलटी झाला.यात ट्रॅक्टरचालक मनोहर राजीराम राऊत रा.कोरंभीटोला हा थोडक्यात बचावला,तर ट्रॉलीवर बसलेला कृष्णा चिलाप हा जागीच ठार झाला आणि दोघे गंभीर जखमी झाले. घटनेची माहिती ग्रामस्थांना होताच घटनास्थळी धाव घेत कुरखेडा पोलिसांना पाचारण करण्यात आले. जखमींना तात्काळ कुरखेडा उपजिल्हा रुग्णालयात दाखल करण्यात आले व मृतदेह उत्तरीय तपासणीसाठी रुग्णालयात दाखल करण्यात आला. प्रकरणी ट्रॅक्टर चालकावर गुन्हा दाखल करून पुढील तपास पीएसआय संदीप ताराम यांनी सुरू केला आहे.