जिल्हाधिकारी कार्यालयातील महसूल सहाय्यक अडकला एसीबीच्या जाळ्यात.. – ५ लाख रुपये घेतांना रंगेहाथ अटक..

नागपूर :-नागपूर जिल्हाधिकारी कार्यालयात महसूल सहाय्यक पदावर कार्यरत असणाऱ्या एका लाचखोर अधिकाऱ्याने बांधकामाशी संबंधित अपील प्रकरण निकाली काढण्यासाठी तब्बल ५ लाख रुपयांची मागणी केली.प्रकरणी काल शुक्रवारच्या रात्री उशिरा पर्यंत लाचलुचपत प्रतिबंधक विभागाने सापळा रचून

नंदनवन परिसरात लाच घेतांना रंगेहाथ अटक केली. नरेश साधूरावजी बर्वे वय ५४ वर्षे,असे लाचखोर अधिकाऱ्याचे नाव आहे.

प्रकरणातील तक्रारदार यांचे शिवाजीनगर,महाल येथील नझुल प्लॉटवरील बांधकामासंदर्भातील अपील अतिरिक्त जिल्हाधिकारी कार्यालयात प्रलंबित होते.ते निकाली काढण्यासाठी बर्वे यांनी ५ लाख रुपयांची मागणी केली होती.दरम्यान,१७ एप्रिल व २० एप्रिलला नागपूर लाचलुचपत प्रतिबंधक विभागाच्या पथकाला पडताळणीत आरोपी लाच मागत असल्याचे दिसून आले.त्यानंतर,पथकाने सापळा रचला.त्यानुसार,काल शुक्रवारच्या रात्री ११:३० वाजेच्या सुमारास तक्रारदाराकडून पंचासमक्ष नरेश बर्वे यांनी ५ लाखांची रक्कम स्वीकारताच पथकाने त्यांना पकडले.अंगझडतीत ५ लाख रुपये जप्त करण्यात आले.या प्रकरणी नंदनवन पोलिस ठाण्यात भ्रष्टाचार प्रतिबंधक कायद्यांतर्गत गुन्हा नोंदविण्याची प्रक्रिया सुरू असून पुढील तपास पोलीस निरीक्षक विवेक पडघान करीत आहेत.