चिमुकल्याचा जीव घेणाऱ्या बिबट्याला जेरबंद करण्यासाठी वनविभाग सज्ज..

गोंदिया :-जिल्ह्याच्या तिरोडा तालुक्यातील खडकी (डोंगरगाव)येथे शुक्रवार ९ जानेवारी रोजी सकाळच्या सुमारास घराच्या मागील बाजूस चुलीजवळ बसून असलेल्या चार वर्षीय हियांश शिवशंकर रहांगडाले या चिमुकल्याला दबा धरून बसलेल्या बिबट्याने झडप घालून उचलून नेले होते.कुटुंबीय व गावकरी मागे धावले असता चिमुकल्याचा काही अंतरावरच मृतदेह आढळून आल्याने कुटुंबीयांनी एकच टाहो फोडला होता.त्यातच, घटना घडताच ग्रामस्थ रहांगडाले यांच्या घराजवळ एकत्र गोळा झाले असता,त्याच दिवशी सकाळी साडे दहा वाजेदरम्यान त्यांच्या घरापासून काही अंतरावरील प्रभू कटरे यांच्या घरातील अंगणात बांधलेला बकरा बिबट्याने उचलून नेला होता.घडलेल्या घटनेने ग्रामस्थांनी वन विभागप्रती संताप व्यक्त केला.सदरची बाब लक्षात घेता वन विभागाने बिबट्याला पकडण्यासाठी चार ठिकाणी पिंजरे लावले आहेत.तीन पिंजरे खडकी पहाडी भागात तर एक पिंजरा लेंडीटोला भागात लावण्यात आला असून बंदोबस्तासाठी वनविभागाच्या चमू तैनात करण्यात आल्या आहेत.चार पिंजरे लावूनही पिंजऱ्यांकडे बिबट भटकत नसल्याने बिबट्यावर लक्ष केंद्रीत करण्यासाठी वन विभाग आता ड्रोन कॅमेऱ्याद्वारे लक्ष केंदीत करणार आहे.