गिझर दुरुस्तीचे काम करतांना विजेचा जोरदार शॉक; तरुणाचा दुर्दैवी मृत्यू..

गडचिरोली :-पाणी गरम करण्याचे गिझर दुरुस्तीचे काम करतांना अचानकपणे विजेचा जोरदार शॉक लागून एका २९ वर्षीय तरुणाचा दुर्दैवी मृत्यू झाल्याची घटना आज, बुधवार ८ जुलै रोजी दुपारच्या सुमारास गडचिरोली शहरात घडली.अरविंद भोपये वय २९ वर्षे,हल्ली रा.शाहूनगर,गडचिरोली(मूळ रा.मुरमाळी)असे मृतक तरुणाचे नाव असून तो विद्युत उपकरणांच्या दुरुस्तीचे काम करायचा.

अरविंद भोपये हा आज बुधवारी गडचिरोली शहराच्या आशीर्वाद नगर परिसरातील प्रदीप इंदूरकर यांच्या घरातील पाण्याचा गिझर बंद पडल्याने दुरुस्तीसाठी गेला होता.गिझर दुरुस्तीचे काम करीत असतांनाच अचानकपणे त्याला विजेचा जोरदार शॉक बसला.यात तो जागीच कोसळला.लागलीच अरविंदला तात्काळ गडचिरोली जिल्हा सामान्य रुग्णालयात नेण्यात आले. मात्र,रुग्णालयातील डॉक्टरांनी तपासणी अंती त्याला मृत घोषित केले.घटनेने परिसरात हळहळ व्यक्त केली जात आहे.