गडचिरोली,देसाईगंज व आरमोरी नगरपरिषदेची ‘या’ ठिकाणी होणार मतमोजणी.. – सकाळी दहा वाजेपासून मतमोजणीला सुरुवात..

गडचिरोली :-जिल्ह्यातील गडचिरोली,देसाईगंज व आरमोरी या तीन नगरपरिषदांच्या सार्वत्रिक निवडणुकांसाठी २ डिसेंबर व आज,शनिवार २० डिसेंबर रोजी काही प्रभागांची मतदान प्रक्रिया पार पडली. त्यानुसार,आता उद्या,रविवार २१ डिसेंबरला जिल्ह्यातील तिन्ही नगरपरिषदेतील मतमोजणीला सकाळी १० वाजेपासून सुरुवात होणार असून मतमोजणीसाठी प्रशासन सज्ज झाले आहे.

गडचिरोली नगरपरिषदेची मतमोजणी कृषी महाविद्यालय,सोनापूर येथे होणार असून येथे प्रत्यक्ष मतमोजणीसाठी ७ व पोस्टल बॅलेटसाठी १ असे एकूण ८ टेबल असतील.देसाईगंज नगरपरिषदेची मतमोजणी देसाईगंज नगरपरिषद सांस्कृतिक सभागृहात पार पडणार असून येथे प्रत्यक्ष मतमोजणीसाठी १० व पोस्टल बॅलेटसाठी १ असे एकूण ११ टेबल निश्चित करण्यात आले आहेत.आरमोरी नगरपरिषदेची मतमोजणी तालुका लघु पशुवैद्यकीय चिकित्सालय येथे होणार असून येथे प्रत्यक्ष मतमोजणीसाठी ३ व पोस्टल बॅलेटसाठी १ असे एकूण ४ टेबल ठेवण्यात आले आहेत.

या निवडणुकीत तीनही नगरपरिषदांमधून नगराध्यक्ष पदासाठी एकूण २३ तर नगरसेवक पदासाठी ३३९ उमेदवार निवडणूक रिंगणात होते.गडचिरोली नगरपरिषदेत नगराध्यक्ष पदासाठी ७ तर नगरसेवक पदासाठी १३१ उमेदवार,देसाईगंज नगरपरिषदेत नगराध्यक्ष पदासाठी ६ व नगरसेवक पदासाठी १०० उमेदवार,तर आरमोरी नगरपरिषदेत नगराध्यक्ष पदासाठी १० व नगरसेवक पदासाठी १०८ उमेदवारांनी निवडणूक लढवली आहे.मतमोजणी प्रक्रिया पारदर्शक व सुरळीतपणे पार पडावी यासाठी सर्व तांत्रिक,प्रशासकीय व सुरक्षा उपाययोजना करण्यात आल्या आहेत.