कोंढाळा येथील माजी सेवानिवृत्त कर्मचाऱ्याचा हृदयविकाराच्या तीव्र धक्क्याने मृत्यू..

देसाईगंज(गडचिरोली):-देसाईगंज तालुक्याच्या कोंढाळा येथील माजी सेवानिवृत्त कर्मचारी केशव शेंडे यांचा वयाच्या ७० व्या वर्षी हृदयविकाराच्या तीव्र धक्क्याने मृत्यू झाल्याची घटना काल,सोमवार ३० जून रोजी दुपारी दीड वाजेच्या सुमारास घडली.केशव शेंडे हे आरोग्य विभागाच्या हत्तीरोग फायलेरिया विभागातून आरोग्य सहाय्यक पदावरून धानोरा येथून काही वर्षांपूर्वी सेवानिवृत्त झाले होते.

केशव शेंडे यांना शनिवारी २८ जूनच्या रात्री  प्रकृतीवस्थामुळे ब्रम्हपुरीच्या वंजारी हॉस्पिटलमध्ये दाखल करण्यात आले होते.तिथे प्राथमिक उपचार घेतल्यानंतर रविवार २९ जून रोजी पुढील उपचाराकरिता सायंकाळच्या सुमारास नागपूरच्या अर्निजा हार्टकेअर या खासगी रुग्णालयात भरती करण्यात आले.रविवारच्या रात्री उपचारानंतर त्यांना बरे वाटू लागले होते.अश्यातच काल सोमवारी सकाळच्या सुमारास राष्ट्रवादी काँग्रेस पक्षाचे(शरद पवार गट) देसाईगंज तालुकाध्यक्ष क्षितिक उके यांनी स्वतः हॉस्पिटलमध्ये जाऊन केशव शेंडे यांची भेट घेत प्रकृती बाबत विचारणा केली असता त्यांच्या प्रकृतीत सुधारणा झाली होती व काहीकाळ त्यांनी कुटुंबीयांसोबत व्हिडिओ कॉलद्वारे संभाषणही केले होते.मात्र,दुपारी दीड वाजेच्या सुमारास अचानकपणे केशव शेंडे यांना हृदयविकाराचा तीव्र धक्का बसला. यात त्यांची प्राणज्योत मालवली.केशव शेंडे हे मृदभाषी,शांत व मनमिळावू स्वभावाचे होते.गावातील सामाजिक कार्यात त्यांचा सक्रिय सहभाग असायचा.आरोग्य सहाय्यक पदावरून सेवानिवृत्त झाल्यानंतर त्यांनी शेती कसण्यावर भर दिला होता.शेतीतून भरघोस उत्पन्न मिळवून शेतकऱ्यांना मोलाचे मार्गदर्शन करायचे.केशव शेंडे यांच्या मृत्यूने गावात हळहळ व्यक्त केली जात आहे.त्यांच्या पश्चात पत्नी, दोन विवाहित मुले,सून,नातवंड असा आप्त परिवार आहे.आज, मंगळवार १ जुलै रोजी दुपारच्या सुमारास त्यांच्या स्वगावी कोंढाळा येथे शोकाकुल वातावरणात अंत्यसंस्कार पार पडले.