कुरखेडाच्या जांभूळखेडा गावात अवैध दारूचा महापूर.. -तरुण पिढी गावठी ब्रँडच्या आहारी..

कुरखेडा(गडचिरोली):-कुरखेडा तालुका मुख्यालयापासून कोरची मार्गे अवघ्या दोन किलोमिटर अंतरावर असलेल्या जांभूळखेडा गावात अवैध दारू विक्रीने अक्षरशः थैमान घातले आहे.गावठी मोहफुलाचा ब्रँड सर्वांचा आवडता पेय झाला असून तरुण पिढी गावठी ब्रँडच्या आहारी गेल्याचे चित्र आहे.या गंभीर समस्येकडे पोलीस विभाग जाणीवपूर्वक दुर्लक्ष करत असल्याचा संतप्त आरोप ग्रामस्थांकडून केला जातो आहे.

कुरखेडा तालुक्यातील जांभूळखेडा गावात ना देशी,ना विदेशी,ना बियर ओन्ली फॉर गावठी ब्रँड मिळतो.या छोट्याश्या गावात जवळपास सात ते आठ अवैध दारू विक्रेते उदयास आले असून गावठी ब्रँड स्वस्तात मस्त मिळत असल्याने सकाळ,दुपार,सायंकाळ अवैध दारू विक्रेत्यांच्या घरी तळीरामांची रेलचेल सुरू असते. दारूच्या अती सेवनाने गावातील अनेक संसार उघड्यावर आले असून अनेकांचे जीवन उद्ध्वस्त झाले आहेत.त्याचबरोबर दारूच्या व्यसनामुळे अनेक तरुण अकाली मृत पावले आहेत.अनेकजण दारूच्या आहारी गेल्याने कुटूंबीय त्रस्त झाले आहेत.विशेष म्हणजे, कुटुंबातील महिला व लहान मुलांना याचा मोठा त्रास सहन करावा लागत आहे.

• पोलीस प्रशासनावर प्रश्नचिन्ह👇

​एकीकडे शासन ‘तंटामुक्त गाव’ आणि ‘नशामुक्त भारत’ सारख्या घोषणा करत असतांना जांभूळखेडा गावात मात्र याच्या अगदी उलट परिस्थिती आहे.गावात उघडपणे अवैध दारूची विक्री होत असतांना यावर आळा घालण्याची जबाबदारी असलेल्या पोलीस प्रशासनाकडून अक्ष्यम्य दुर्लक्ष केले जात आहे.यामुळे गावातील शांतता व सुव्यवस्था धोक्यात आली आहे.अवैध धंद्यांवर कारवाई करण्यात प्रशासन कानाडोळा करत असल्याचा थेट आरोप नागरिक करत आहेत.​गावातील सुजाण नागरिक तसेच महिला वर्ग यावर त्वरित आळा घालण्याची व कठोर कारवाई करण्याची मागणी करीत आहेत.गावातील अवैध दारू विक्री  थांबवावी.या बेकायदेशीर धंद्यात गुंतलेल्यांवर त्वरित कारवाई करावी.तरुण पिढीला व्यसनापासून दूर ठेवण्यासाठी जनजागृती मोहीम राबवावी.या गंभीर समस्येकडे प्रशासनाने तातडीने लक्ष घालून कठोर पाऊले उचलावीत; अशी मागणी ग्रामस्थांनी केली आहे.