ऑटो रिक्षा अपघातात अंगणवाडी सेविकेसह मुलाचा घटनास्थळीच दुर्दैवी मृत्यू..

नागपूर :-वाढदिवसाचे कार्यक्रम आटोपून स्वतःच्या ऑटो रिक्षाने घरी परत येत असतांना वाटेतच रात्रीच्या सुमारास भरधाव ऑटो दुभाजकावर धडकली आणि ऑटो रस्त्यावर पलटी झाला.त्यामुळे चालक रोहित आणि मागच्या प्रवासी सीटवर बसलेली त्याची आई करुणा दोघांनाही डोक्याला जबर मार लागल्याने त्यांचा जागीच मृत्यू झाला असल्याची घटना नागपूर शहराच्या हिंगणा-एमआयडीसी पोलीस ठाण्याच्या हद्दीत घडली.यात २५ वर्षीय मुलासह आईचा घटनास्थळीच दुर्दैवी मृत्यू झाला.रोहित गोपाल साखरे वय २५ वर्षे आणि त्याची आई करुणा गोपाल साखरे वय ४९ वर्षे अशी मृतकांची नावे आहेत.रोहित हा ऑटो चालक असून त्याची आई करुणा साखरे ही अंगणवाडी सेविका होती.मुलगा रोहित आणि त्याची आई रोहितच्या चुलत बहिणीकडे वाढदिवसाच्या कार्यक्रमाला गेले होते. त्यानंतर घरी परततांना वाटेतच दुर्दैवी घटना घडली. पोलिसांना घटनेची माहिती मिळताच, त्यांनी घटनास्थळी दाखल होत पंचनामा केला व दोन्ही मृतदेह उत्तरीय तपासणीसाठी रुग्णालयात दाखल केले.