एका कुरकुऱ्याच्या पाऊचने घेतला दुसरीत शिकणाऱ्या चिमुकल्याचा प्राण..

गोंदिया :-एका कुरकुऱ्याच्या पाऊचने दुसरीत शिकणाऱ्या चिमुकल्याचे प्राण घेतले असल्याची घटना काहीशी वेगळीच वाटत असल्याने अनेकांना प्रश्न पडला असेल की,कुरकुऱ्याचा पाऊच एखाद्या चिमुकल्याचे प्राण कसे काय घेऊ शकतो? तर हे खरे आहे.अशीच काहीशी घटना गोंदिया जिल्ह्याच्या गोरेगाव तालुक्यातील सोनेगाव येथे दोन दिवसांपूर्वी म्हणजेच सोमवारी १६ डिसेंबरला दुपारच्या सुमारास घडली.

हल्ली शाळेच्या परिसरा नजिक,पान टपरी,किराणा दुकान व इतर दुकानांमध्ये लहान मुलांसाठी चॉकलेट, चिप्स,कुरकुरे व इतर खेळणीचे साहित्य असलेली खाद्य पदार्थ सहजासहजी मिळत असतात. सगळीकडेच लहान मुले सर्वात जास्त मोठ्या आवडीने कुरकुरे खातांना दिसून येतात.अशातच घटनेच्या दिवशी इयत्ता दुसऱ्या वर्गात शिक्षण घेत असलेला ८ वर्षीय शिवान्स लांजेवार याने कुरकुऱ्याचे पाऊच घेतले.त्यामध्ये त्याला छोटीशी प्लास्टिकचे खेळणे मिळाले.खेळता-खेळता शिवान्सने ते तोंडात टाकले; मात्र ते घश्यात अडकल्याने त्याला श्वास घेण्यास त्रास होऊ लागला.सदरची बाब कुटुंबीयांच्या लक्षात आल्याने त्याला लगेच रुग्णालयात नेले; पण रुग्णालयात नेत असतांनाच त्याचा वाटेतच दुर्दैवी

मृत्यू झाला.