अजब कर्मचाऱ्याची गजब कहाणी..! नायब तहसीलदार पदावरून जो कोसळला; तो थेट तलाठी पदावर पोहचला..

गोंदिया :-तुम्ही कितीही लुकाछुपीचे खेळ करा,पण ज्या दिवशी तुमच्या करून कहाण्यांचे घडे भरले, त्यादिवशीपासून तुमच्या विनाशकारी जीवनाची सुरुवात होऊन शेवट झाल्याशिवाय राहणार नाही.अश्याच प्रकारचे प्रकरण गोंदिया तहसील कार्यालयात उघडकीस आले आहे.विशेष म्हणजे,तलाठी पदावरून झालेली बढती थेट नायब तहसिलदारापर्यंत पोहचली खरी; पण कुणाची तरी नजर लागल्याने परत नायब तहसिलदार पदावरून पूर्वपदावर म्हणजेच तलाठी पदावर समाधान मानावे लागले आहे.ही घटना गोंदिया तहसील कार्यालयात कार्यरत नायब तहसीलदार प्रकाश बसंतकुमार तिवारी यांच्या बाबतीत घडली असून त्यांनी खोटी माहिती व खोट्या कागदपत्रांच्या आधारे नायब तहसिलदार पद मिळवल्याचा ठपका ठेवत राज्यपाल यांच्या आदेशाने शासनाच्या महसूल विभागाचे कार्यासन अधिकारी श्रीकांत मोहिते यांनी आदेश काढून तिवारी यांना पूर्वपदावर राहण्याचे फर्मान सोडले आहे.

तिवारी यांनी खोटी माहिती व कागदपत्रांच्या आधारे पदोन्नती घेतल्याची बाब समोर येताच गोंदिया अप्पर तहसील कार्यालयातील तलाठी जी.बी.हटवार यांनी संबंधित विभागाकडे तक्रार केली होती.तक्रारीच्या अनुषंगाने याची चौकशी करण्यात आली.चौकशीत तिवारी यांनी महसूल अर्हता परीक्षा उत्तीर्ण झाली नसल्याची बाब व खोट्या कागदपत्रांच्या आधारे पदोन्नती मिळविली असल्याचे निष्पन्न झाले.त्यांच्या महसूल अर्हता परीक्षेबाबत सेवापुस्तकात चुकीची नोंद घेण्यात आल्यामुळे त्यांना मंडळ अधिकारी व नायब तहसीलदार पदावर देण्यात आलेली पदोन्नती त्वरित रद्द करून तिवारी त्यांना तलाठी संवर्गात नियुक्त करण्यात आले आहे.