उद्रेक न्युज वृत्त
नाशिक :- जिल्ह्यातील त्र्यंबकेश्वर तालुक्यातील ब्राम्हणवाडे गावातील मळे परिसरात संध्याकाळच्या सुमारास ४ वर्षीय मुलगी घराजवळच्या परिसरात खेळत होती.अंधार असल्याचा फायदा घेत बिबट्याने ४ वर्षीय चिमुकलीवर झडप घालून तिला आपल्या जबड्यात धरून फरफटत जंगलाच्या दिशेने नेले. ही बाब स्थानिक रहिवाशांच्या लक्षात येताच त्यांनी आरडाओरडा करून गावकऱ्यांना माहिती दिली. तसेच,घटनेची माहिती तात्काळ वनविभागाला देण्यात आली.माहिती मिळताच वनविभागाचे अधिकारी कर्मचारी घटनास्थळी दाखल झाले.वनरक्षक,वन मजुरांसह गावकऱ्यांचे शोध कार्य सुरू असतांना काही अंतरावर मुलीचा मृतदेह आढळून आला.सदर घटनेने सर्वत्र हळहळ व्यक्त केली जात आहे.
ब्राम्हणवाडे येथील नवसू पांडू कोरडे यांची ४ वर्षांची मुलगी नयनाला बिबट्याने घराच्या अंगणातून नेले असल्याने परिसरातील नागरिकांमध्ये भीतीचे वातावरण पसरले आहे.सदर घटनेने नागरिकांमध्ये प्रचंड संतापाची लाट पसरली असून तीव्र संताप व्यक्त केला जात आहे.स्थानिक नागरिकांकडून वन विभागाला धारेवर धरत बिबट्याचा संचार वाढल्याने उपाययोजना करण्याची मागणी केली जात आहे.
