उद्रेक न्युज वृत्त
गडचिरोली :-जिल्ह्याच्या भामरागड दलमचा सदस्य असलेला ४५ वर्षीय नक्षली लच्चू करिया ताडो याने आज,बुधवार दिनांक-२४ जुलै रोजी गडचिरोली पोलिसांसमोर आत्मसमर्पण केले आहे.राज्यसरकारने त्याच्यावर २ लाखाचे बक्षिस जाहीर केले होते.ताडो हा भामरागड तालुक्यातील भटपार येथील रहिवासी आहे.२०१२-१३ पासून तो गावात राहून जनमिलिशिया म्हणून नक्षल्यांना राशन आणून देणे, नक्षल्यांची शस्त्रे लपवून ठेवणे,पोलिसांची माहिती नक्षल्यांना देणे अशाप्रकारची कामे करीत होता. गतवर्षी तो भामरागड दलमचा सदस्य झाला. त्याच्यावर जाळपोळ आणि जमिनीत स्फोटके पुरुन ठेवण्याचे दोन गुन्हे दाखल आहेत.२०२२ मध्ये इरपनार गावाजवळच्या रस्त्यावर नक्षल्यांनी १९ वाहनांची जाळपोळ केली होती.त्यात लच्चूचा प्रत्यक्ष सहभाग होता.या शिवाय २०१३ मध्ये नेलगुंडा गावाजवळच्या जंगलात स्फोटके पुरुन ठेवण्यातही तो सहभागी होता.राज्य सरकारने आत्मसमर्पण योजना सुरु केल्यापासून आतापर्यंत ६७० नक्षल्यांनी पोलिसांपुढे आत्मसमर्पण केले आहे.
