२५ वर्षीय तरुणाने वडिलाची केली हत्या; आरमोरी तालुक्यातील घटना..

गडचिरोली :-जिल्ह्याच्या आरमोरी तालुक्यातून एक धक्कादायक घटना आज,सोमवार १३ एप्रिल रोजी सर्वत्र उघडकीस आली.एका एकुलत्या एक २५ वर्षीय मुलाने आपल्याच वडिलाची हत्या करून वडिलाचा शोध घेण्याचे नाटक केले,पण केलेले नाटक काही काळापुरतेच राहिले आणि त्याला बेड्या पडल्याची घटना काल रविवारच्या रात्री आरमोरी तालुक्यातील पालोरा येथे घडली.देवाजी आडकू धकाते वय ६५ वर्षे, रा.ताडूरवारनगर,आरमोरी,जि.गडचिरोली असे हत्या झालेल्या वडिलाचे नाव आहे,तर योगेश देवाजी धकाते वय २५ वर्षे,असे आरोपी मुलाचे नाव असून पोलिसांनी त्याला अटक केली आहे.विशेष म्हणजे,आरोपी मुलाने किरकोळ कारणावरुन वडिलाची हत्या केल्याचे पोलीस तपासात समोर आले आहे.

आरमोरी तालुक्याच्या पालोरा गावाजवळ धकाते कुटुंबाची वीटभट्टी असल्याने वडील आणि मुलगा त्या ठिकाणी दिवसभर काम करायचे.देवाजी धकाते यांना पाच मुली असून सहावा मुलगा योगेश आणि एकुलता एक.पाचही मुलींचे विवाह झाले असून योगेशचाही वर्षभरापूर्वी विवाह झाला होता.योगेश लग्नानंतर आई-वडिलांसोबतच राहत होता.त्याची पत्नी गर्भवती असतांना वडील किरकोळ कारणावरुन रागवायचे. शिवाय,गर्भवती असूनही तिला काम सांगायचे,सदरची बाब योगेशला खटकत होती.यातून वडील आणि मुलात वाद व्हायचा.अश्यातच मुलगा योगेशच्या मनात वेगळीच खिचडी पकु लागली.त्यानुसार,त्याने वडिलाची हत्या करण्याचा कट रचला.काल,रविवार १२ एप्रिल रोजी अंधार पडल्यावर वीटभट्टीवरुन घरी परत येत असतांनाच वडिलांच्या आधीच योगेशने घराचा रस्ता धरला. सायंकाळी साडेसात वाजता वडील घराकडे पायी परतत होते.पालोरा गावाजवळच्या बोगद्यानजीक वडील पोहोचताच तेथे आधीच दबा धरुन बसलेल्या योगेशने त्यांच्यावर पाठीमागून कुऱ्हाडीने वार केले.यावेळी वडील मुलगी निकिताशी फोनवरुन बोलत होते,हल्ल्यानंतर मेलो रे… म्हणत ते जोरात ओरडले.तिने तातडीने शेजाऱ्यांना फोन करुन माहिती दिली.दरम्यान,इकडे वडिलांची हत्या करून रक्ताने माखलेल्या कुऱ्हाडीसह योगेशने घर गाठले.कुऱ्हाड पाण्याने धुतली आणि

आई कमलबाई,चुलतभाऊ रुपेशसोबत वडिलांना शोधण्याचे नाटक केले.अखेर बोगद्याजवळ वडिलांचा रक्ताच्या थारोळ्यात पडलेला मृतदेह आढळला. दरम्यान,आरमोरी ठाण्याचे पोलिस निरीक्षक कैलास गवते यांनी पोलीस ताफ्यासह घटनास्थळ गाठले.यावेळी योगेशच्या हालचाली संशयास्पद वाटू लागल्याने पोलिसांनी त्यास ताब्यात घेऊन पोलिसी खाक्या दाखवताच तो पोपटासारखा बोलू लागला आणि शेवटी वडिलाच्या हत्येची कबुली दिली.त्यानुसार,पोलिसांनी त्याच्यावर गुन्हा नोंदवला.

कित्येकजण वंशाचा दिवा म्हणून मुलासाठी देवाकडे साकडे घालतात.यासाठी वाट्टेल ते करायला तयार असतात.पण,तोच मुलगा एखाद्या जन्मदात्या वडिलांची हत्या करत असेल तर..’मुलापेक्षा मुलगी बरी,प्रकाश देते दोन्ही घरी’ असे म्हणणे चुकीचे ठरणार नाही.