२२ मिनी सेतू केंद्रचालकांची भरती प्रक्रिया; अंतिम पात्र-अपात्र यादी प्रसिद्ध..

गडचिरोली :-जिल्ह्यातील १३ ‘दादालोरा खिडकी’ आणि ९ ‘आदी सेवा केंद्र’ अशा एकूण २२ केंद्रांच्या माध्यमातून नागरिकांना विविध शासकीय व लोकाभिमुख सेवा पुरविण्यासाठी तसेच स्थानिक पातळीवर डिजिटल सेवा सक्षम करण्याच्या दृष्टीने मिनी सेतू केंद्रचालकांची(आपले सरकार सेवा केंद्र)भरती प्रक्रिया राबविण्यात येत आहे.या अनुषंगाने मिनी सेतू केंद्रचालक निवडीकरिता प्राप्त अर्जांची अंतिम पात्र व अपात्र यादी जिल्ह्याच्या अधिकृत संकेतस्थळावर प्रसिद्ध करण्यात आली आहे.

जिल्हाधिकारी अविश्यांत पंडा यांनी दिलेल्या माहितीनुसार,इलेक्ट्रॉनिक्स,माहिती तंत्रज्ञान व कृत्रिम बुद्धिमत्ता विभागाच्या ९ जुलै २०२६ रोजीच्या शासन शुद्धीपत्रकातील तरतुदींनुसार ही निवड प्रक्रिया राबविली जात आहे.या शुद्धीपत्रकातील मुद्दा क्र.७ (४)अन्वये संबंधित उमेदवारांच्या पोलीस चारित्र्य पडताळणीच्या अटींच्या अधीन राहून ही अंतिम पात्र-अपात्र यादी तयार करण्यात आली आहे.

नागरिकांना थेट गावपातळीवर पारदर्शक व गतिमान डिजिटल सेवांचा लाभ मिळावा,यासाठी ही केंद्रे अधिक सक्षम केली जात आहेत.अर्जदारांना सदर अंतिम पात्र व अपात्र यादी गडचिरोली जिल्ह्याच्या अधिकृत संकेतस्थळावर (www.gadchiroli.gov.in)पाहता येईल,असे प्रशासनामार्फत स्पष्ट करण्यात आले आहे.