सिलेंडरचा स्फोट; आग आटोक्यात आणण्यासाठी धावपळ,कामगार अडकल्याची भीती..

मुंबई :-शहरातील अंधेरी पूर्व भागातील एमआयडीसी परिसरातील भंगारवाडीमध्ये चार ते पाच लाकडाच्या दुकानात मोठी आग लागली असल्याची घटना आज,शुक्रवारी सायंकाळी साडे सातच्या सुमारास घडली.लाकूड गोदाममध्ये सिलेंडरचा स्फोट झाल्यामुळे सदरची आग लागली.परिसरात आजूबाजूला मोठ्या प्रमाणात गाळे असून गाळ्यात केमिकल आणि लाकडाचा गोदाम असल्यामुळे जवळपास ८ ते १० गाळ्यांमध्ये आग वाढली.आगीने रौद्ररूप धारण करताच परिसरातील नागरिकांनी अग्निशामन दलास कळविले.अग्निशामन दल घटनास्थळी दाखल होत परिसरातील नागरिकांनीही आग आटोक्यात आणण्यासाठी प्रयत्न सुरू केले. आगीत आठ ते दहा सिलेंडर स्फोट झाल्याचा अंदाज वर्तविण्यात येत आहे.

गोदामांमध्ये मोठ्या संख्येने काम करणारे कामगार असून काही कामगार बाहेर निघाले,तर काही कामगार आत अडकल्याची भीती व्यक्त करण्यात येत आहे. परिसरातील पंधरा ते वीस घर आणि गोदाम जळून खाक झाले आहेत.घरात आणि गोदामांमध्ये मोठ्या प्रमाणात सिलेंडर असल्यामुळे ही आग वाढली. झोपडपट्टी मधून लोकांना बाहेर काढण्याचे काम युद्ध पातळीवर सुरू असून मोठ्या प्रमाणात सिलेंडर ब्लास्ट होत असल्यामुळे अग्निशामन दलातील जवानांना आग विझवण्यामध्ये अडथळा निर्माण होत आहे.दरम्यान,स्थानिक पोलीस आणि अग्निशामन दलाचे जवान घटनास्थळावर दाखल होऊन झोपडपट्टी खाली करीत आहेत.