शेतावर गेला ‘तो’ घरी परतलाच नाही; आज सापडला मृतदेह.. – कोंढाळा येथील घटना..

कोंढाळा(गडचिरोली):-शेतावर धानपिकाला खत मारण्यासाठी गेलेल्या शेतकऱ्याचा दुसऱ्या दिवशी चक्क मृतदेह आढळून आल्याने परिसरात एकच खळबळ उडाली आहे.सदरची घटना ही देसाईगंज तालुक्याच्या कोंढाळा गाव नजीकच्या शेतशिवारात आज,रविवार २३ ऑगस्ट रोजी सकाळी साडे नऊ वाजताच्या सुमारास उघडकीस आली.सुरेश डोमा सहारे वय ६२ वर्षे, रा.कोंढाळा,ता.देसाईगंज,जि.गडचिरोली असे शेतावर मृतावस्थेत आढळून आलेल्या शेतकऱ्याचे नाव आहे.

गेल्या दोन दिवसांपासून देसाईगंज तालुक्याच्या काही भागात पावसाने दमदार हजेरी लावल्याने शेतीसाठी पोषक वातावरण निर्माण झाले आहे.त्यामुळे,पिकांसाठी लागणाऱ्या पाण्याची अडवणूक करणे,तसेच शेतातील धान पिकांसाठी आवश्यक असणारी खते मारण्यासाठी परिसरातील शेतकरी बांधव शेतावर जातांना दिसून येतात.अश्याच प्रकारे कोंढाळा येथील शेतकरी सुरेश सहारे हे काल शनिवारच्या सकाळी ११ वाजताच्या सुमारास आपल्या शेतावर खत मारण्यासाठी गेले होते. मात्र,सायंकाळ होऊनही ते घरी परतले नसल्याने कुटुंबीयांनी परिसरात तसेच इतरत्र शोधाशोध सुरू केली. रात्री उशिरापर्यंत शोध घेऊनही सुरेश सहारे यांचा कुठेही थांगपत्ता लागलेला नव्हता. अश्यातच परत आज रविवारी सकाळच्या सुमारास कुटुंबीयांनी शेतशिवारात शोध घेतला असता सुरेश सहारे हे शेतातील बांधीत निपचित पडल्याचे दिसून आले.लागलीच कुटुंबीयांनी घटनेची माहिती गावातील पोलीस पाटील किरण कुंभलवार यांना दिली. कुंभलवार यांनी तात्काळ शेत शिवारातील घटनास्थळ गाठून घटनेबाबत देसाईगंज पोलीस ठाण्याला कळवून पोलिसांना पाचारण केले. त्यानुसार,देसाईगंज पोलीस ठाण्याचे सहाय्यक पोलीस निरीक्षक मनीष गोडबोले,पोलीस उपनिरीक्षक अनिल डेरकर,बिट अंमलदार करण हुर्रा यांनी घटनास्थळी दाखल होत घटनेचा पंचनामा करून उपस्थित नागरिकांच्या सहाय्याने मृतदेह उत्तरीय तपासणीसाठी देसाईगंज ग्रामीण रुग्णालयात पाठवला.शेतावर गेलेल्या शेतकऱ्याचा अचानकपणे दुर्दैवी मृत्यू झाल्याने

परिसरात हळहळ व्यक्त केली जात असून प्रकरणाचा पुढील तपास देसाईगंज पोलीस ठाण्याचे पोलिस निरीक्षक स्वप्निल इजप्पवार यांच्या मार्गदर्शनाखाली सुरू करण्यात आला आहे.