शेतातील वालाच्या शेंगा तोडत असतांना वाघाचा हल्ला; पत्नीचा मृत्यू तर पतीला किरकोळ दुखापत..

नागपूर :-जिल्ह्याच्या रामटेक तालुक्यात वाघाच्या हल्ल्यात गंभीर जखमी झालेल्या पत्नीचा मृत्यू झाला, तर पतीला किरकोळ दुखापत झाल्याची घटना काल शुक्रवारी दुपारच्या सुमारास सावरा गाव नजीकच्या शेत शिवारात घडली.घटनेच्या वेळी पती-पत्नी त्यांच्या शेतातील वालाच्या शेंगा तोडत असतांनाच दबा धरून बसलेल्या वाघाने हल्ला चढवला यात मुक्ता जुगड्या मरसकोल्हे वय ३५ वर्षे असे मृत पत्नीचे नाव आहे;तर जुगड्या मरसकोल्हे वय ४० वर्षे,रा.सावरा,ता. रामटेक, जि.नागपूर असे जखमी पतीचे नाव आहे.

मरसकोल्हे यांची सावरा गावाच्या शिवारात जंगलालगत शेती आहे.वालाच्या शेंगा विकायला न्यायच्या असल्याने दोघेही त्यांच्या शेतातील वेलींना लागलेल्या पक्व शेंगा तोडत होते.काही कळण्याच्या आत जंगलातून आलेल्या वाघाने मुक्तावर झडप मारली.वाघ तिला फरफटत नेत असतांना पती जुगड्याने तिला सोडविण्याचा प्रयत्न केला.परंतु, फारसे यश न आल्याने त्याने आरडाओरड केली.ओरडण्याचा आवाज ऐकून शेजारच्या शेतातील शेतकरी व मजूर मदतीला धावून आल्याने वाघाने तिला सोडले व जंगलाच्या दिशेने पळून गेला.गळा,मान,चेहरा व शरीराच्या अन्य भागावर गंभीर जखमा झाल्याने तिचा घटनास्थळीच मृत्यू झाला.माहिती मिळताच पेंच व्याघ्र प्रकल्पाच्या उपवनसंरक्षक पूजा लिंबगावकर,क्षेत्र संचालक अक्षय गजभिये,उपविभागीय पोलिस अधिकारी रमेश बरकते,ठाणेदार नारायण तुरकुंडे,अरविंदकुमार कतलाम व राजेश थोरात,पवनी बफर झोनचे लक्ष्मीकांत ठाकरे, प्रादेशिकचे सागर बन्सोड,जयेश तायडे यांनी घटनास्थळ गाठून पाहणी करून पंचनामा केला व जखमी जुगड्या मरसकोल्हे यांना रुग्णालयात उपचारार्थ दाखल केले.घटनेने परिसरात भीतीचे वातावरण पसरले असून शेतकऱ्यांमध्ये धास्ती निर्माण झाली आहे.