व्हॉट्सॲपवर आलेली अनोळखी लिंक उघडणे तरुणाला पडले महागात; लिंक उघडताच मोबाइल हॅक..

नागपूर :-एका २५ वर्षीय तरुणाला व्हॉट्सॲपवर आलेली अनोळखी लिंक उघडणे चांगलेच महागात पडले आहे.लिंक उघडताच मोबाइल हॅक झाला आणि सायबर चोरट्यांनी मोबाईल मधील डाटा व संपर्क क्रमांकाची यादी ताब्यात घेतली.त्यानंतर तरुणाच्या चेहऱ्याचा वापर करून अश्लील मॉर्फ फोटो तयार केले आणि ते नातेवाइक व परिचितांना पाठवून १५ हजार रुपयांची खंडणी मागितली.पैसे न दिल्यास हे फोटो समाजमाध्यमांवर प्रसारित करण्याची धमकी देण्यात आली.या प्रकरणी तरुणाने दिलेल्या तक्रारीवरून हुडकेश्वर पोलिसांनी अज्ञात आरोपींविरोधात गुन्हा दाखल केला आहे.

तक्रारदार तरुण शीतपेय कंपनीच्या एजन्सीत काम करतो.काही दिवसांपूर्वी त्याच्या व्हॉट्सॲपवर अनोळखी लिंक आली होती.त्याने ती उघडताच मोबाइलमधील माहिती सायबर फसवणूक करणाऱ्यांच्या हाती लागली. आरोपींनी संपर्क यादी मिळवल्यानंतर तरुणाच्या चेहऱ्याचा वापर करून अश्लील मॉर्फ फोटो तयार केले.हे फोटो त्याच्या परिचित आणि नातेवाइकांना पाठवण्यास सुरुवात केली.अचानक अशा प्रकारचे फोटो नातेवाइकांना पाठवले जात असल्याने तरुण घाबरला. त्याचदरम्यान दोन वेगवेगळ्या मोबाइल क्रमांकांवरून अज्ञात आरोपींनी त्याच्याशी संपर्क साधला.फोटो समाजमाध्यमांवर प्रसारित न करण्यासाठी १५ हजार रुपये देण्याची मागणी केली.पैसे न दिल्यास आणखी फोटो प्रसारित करण्याची धमकी दिली.प्रसंगी तरुणाने पोलीस ठाण्यात धाव घेत तक्रार नोंदवली.सायबर सेलच्या मदतीने अज्ञात ठकबाजांचा शोध घेतला जात आहे.विशेष म्हणजे,नागरिकांनी अनोळखी व्यक्तींनी मोबाईलवर पाठविलेली लिंक न उघडता समोरच्या व्यक्तीचा क्रमांक तात्काळ ब्लॉक करून घ्यावे, जेणेकरून कुठल्याही प्रकारची होणारी फसवणूक टाळता येईल.