उद्रेक न्युज वृत्त :- छत्तीसगड-महाराष्ट्र राज्याच्या सीमेवर असलेल्या नारायणपूरच्या अबुझमाड येथील कुतुल भागात पोलिस आणि नक्षलवाद्यांमध्ये चकमक सुरू आहे.या चकमकीत जवानांनी ८ माओवाद्यांचा खात्मा केल्याचे सांगण्यात येत आहे. ठार झालेल्या नक्षलवाद्यांचा आकडा आणखी वाढू शकतो.या चकमकीत एक जवान शहीद झाला असून दोन जवान जखमी झाले आहेत.या वर्षी जानेवारीपासून आतापर्यंत १६१ दिवसांत जवानांनी १४१ नक्षलवाद्यांचा खात्मा केलाआहे.
कुतुल, फरसाबेडा, कोडामेटा भागात मोठ्या प्रमाणात नक्षलवादी उपस्थित असल्याची माहिती पोलिसांना मिळाली होती. गुप्तचराकडून मिळालेल्या या माहितीनंतर, बस्तर विभागातील जगदलपूर,दंतेवाडा,कोंडागाव आणि कांकेर येथून सुमारे १४०० डीआरजी आणि एसटीएफ जवानांना ऑपरेशनसाठी बाहेर काढण्यात आले.गेल्या १५ दिवसांपासून सैनिक नक्षलवाद्यांविरोधात कारवाई करत आहेत.
जवानांनी नक्षलवाद्यांच्या अड्ड्याला वेढा घातला आहे.एक दिवस अगोदरही दिवसभर सैनिकांच्या या संयुक्त पथकात अधूनमधून गोळीबार होत होता.आज १५ जूनच्या सकाळपासून पुन्हा चकमक सुरू आहे. मिळालेल्या माहितीनुसार, दलाने आतापर्यंत ८ माओवाद्यांचा खात्मा केला आहे.ठार झालेल्या नक्षलवाद्यांची संख्याही वाढू शकते.सैनिक परतल्यावर अधिक माहिती मिळेल,असे अधिकाऱ्यांचे म्हणणे आहे.
