पती समोरच पत्नीने पुलावरून नदीत उडी घेतली अन् क्षणात पाण्यात दिसेनाशी झाली..

नागपूर :-गावी जाण्यासाठी घरून निघालेले पती-पत्नी दोघेही मोठ्या आनंदात होते.घरातील देवाऱ्यापुढे असलेली फुले व इतर पूजेचे साहित्य नदीत फेकून देण्यासाठी वाटेत असणाऱ्या नदीच्या पुलावर काहीकाळ थांबले व दोघांनीही सेल्फी काढत  काही फोटो घेतले.त्याचवेळी पत्नीने अचानकपणे पुलावरून नदीत उडी घेतली आणि क्षणात पाण्यात दिसेनाशी झाली.सर्व काही अचानक घडल्याने पतीने  आरडाओरड करत नदीच्या दिशेने धाव घेतली. आजूबाजूच्या लोकांनी गर्दी केली,मात्र तोपर्यंत पत्नीचा काहीही थांगपत्ता लागलेला नाही.सुखी संसाराची स्वप्ने रंगवू पाहणाऱ्या कुटुंबात क्षणात सर्वत्र दुःखाचे सावट पसरल्याची मन हेलावणारी घटना काल,शनिवारी दुपारी चारच्या सुमारास नागपूर जिल्ह्याच्या कामठी तालुक्यातील नेरी शिवारातील कन्हान नदीच्या पुलावर घडली.

याबाबत अधिक माहिती अशी की,ज्ञानेश्वरी विजय साकोरे वय २४,रा.काचूरवाही,ता.रामटेक,जि.नागपूर ही विजय साकोरे पतीसोबत नागपूरहून मूळगावी काचूरवाही येथे जात असतांना वाटेत पडणाऱ्या

नेरी येथील कन्हान नदी पुलावर दोघेही थांबले.देवाला अर्पण केलेल्या वस्तू विसर्जनासाठी थांबले असतांना दोघांनी सेल्फी काढली व काही फोटो घेतले.त्याचवेळी ज्ञानेश्वरीने अचानक पुलावरून नदीत उडी घेतली आणि क्षणात पाण्यात दिसेनाशी झाली.सर्व काही अचानक घडल्याने पती विजय साकोरेने आरडाओरड करत नदीच्या दिशेने धाव घेतली.आजूबाजूच्या लोकांनी गर्दी केली,मात्र तोपर्यंत ज्ञानेश्वरीचा काहीही थांगपत्ता लागला नव्हता.घटनेची माहिती मिळताच कन्हान पोलिस ठाण्याच्या ठाणेदार वैजयंती मांडवधरे व पोलिस उपनिरीक्षक राहुल चव्हाण आपल्या पथकासह घटनास्थळी दाखल झाले.कामठी पोलिस ठाण्याचे वरिष्ठ पोलिस निरीक्षक महेश आंधळे आणि पोलिस उपनिरीक्षक मनीषा जाधव यांनीही शोधकार्यात सहभाग घेतला.स्थानिक पोहणाऱ्यांच्या मदतीने नदीत शोध घेण्यात आला,मात्र सायंकाळी अंधार पडल्यामुळे शोधकार्य थांबवावे लागले. ज्ञानेश्वरीचे माहेर भूगाव,ता.कामठी येथे असून नातेवाईक व गावकरी घटनास्थळी तातडीने दाखल झाले.महिलांचा हंबरडा व वृद्धांचा विलाप पाहून उपस्थितांचे मन हेलावले. घटनास्थळी रात्रीपर्यंत शोधकार्य सुरू होते,मात्र महिला सापडलेली नाही.