धावत्या पिकअप वाहनाचा अपघात; नऊ जण गंभीर जखमी,तर आठ जण किरकोळ जखमी..

उद्रेक न्युज वृत्त :-पोटाची खळगी भरण्यासाठी बाहेर जिल्ह्यात निघालेल्या मजुरांच्या वाहनाचा अपघात झाल्याची घटना आज,शनिवार ३ ऑक्टोंबर रोजी पहाटेच्या सुमारास अमरावती जिल्ह्यातील तळेगाव दशासर पोलिस ठाण्याच्या हद्दीतील समृद्धी महामार्गावर घडली.धावत्या पिकअप वाहनाचे पुढील डाव्या बाजूचे टायर अचानकपणे निखळल्याने चालकाचे वाहनावरील नियंत्रण सुटले आणि वाहन महामार्गावर उलटला.यात नऊ मजूर गंभीर जखमी झाले,तर आठ जण किरकोळ जखमी झाले.सर्व मजूर हे भंडारा जिल्ह्याच्या लाखांदूर तालुक्यातील आथली,डांबेविरली व मांदेड येथील असल्याची माहिती समोर आली आहे.ते बुलढाण्याच्या दिशेने सोयाबीन कापणीच्या कामासाठी निघाले होते. मोहन शीरभाऊ,उषा शिवरकर,रीना रामटेके,कमोद भावे, बंडू उरकुडे, योगेश उरकुडे,संजय सोंदरकर,शांता सोनवणे व वंदना बुराडे अशी गंभीर जखमींची नावे आहेत.तर किरकोळ जखमींमध्ये रोहित सहारे,अमर सहारे, स्वभा वाघमारे,विनोद रामटेके,अजय राऊत, अशोक कुंबले,महेंद्र शिवरकर व ललिता राऊत यांचा समावेश आहे.सर्व जखमींना तातडीने धामणगाव रेल्वे येथील ग्रामीण रुग्णालयात उपचारासाठी दाखल करण्यात आले असून अपघातात कुठल्याही प्रकारची जीवितहानी झालेली नसली तरीही अचानक घडलेल्या प्रसंगाने हळहळ व्यक्त केली जात आहे.