उद्रेक न्युज वृत्त
गडचिरोली :- गेली दोन दिवसांपासून बेपत्ता असलेला युवक गडचिरोली पासून आरमोरी मार्गे १३ किलोमिटर अंतरावर असलेल्या पोर्ला-मोहझरी मार्गावरील गजानन महाराज मंदिर परिसरात मृतावस्थेत आढळून आला असल्याची घटना आज,दिनांक- ३ जून रोजी दुपारी ४ च्या सुमारास उघडकीस आली आहे.रितेश नागदेवते वय ४० वर्षे,रा.रामनगर,गडचिरोली असे मृताचे नाव आहे.
मिळालेल्या माहितीनुसार,रितेश हा दोन दिवसांपासून घरच्यांना न सांगता,घरून निघून गेला होता.घरच्यांनी शोधाशोध केली; मात्र,त्याचा कुठेही थांगपत्ता लागलेला नव्हता.अशातच आज,दुपारच्या सुमारास काही नागरिकांना पोर्ला-मोहझरी मार्गावरील गजानन महाराज मंदिर परिसरात कुणीतरी पँट आणि शर्ट काढून झोपलेल्या अवस्थेत दिसला.जवळ जाऊन बघितले तर अज्ञात युवक मृतावस्थेत असल्याचे दिसून आले.याबाबत गडचिरोली पोलीस प्रशासनास माहिती देण्यात आली.पोलीस प्रशासन घटनास्थळी दाखल होऊन प्रेत शवविच्छेदनासाठी सामान्य रुग्णालय गडचिरोली येथे पाठविण्यात आला. मात्र,सदरची घटना ही संशयास्पद असल्याचे दिसून येते.घरून निघालेला व्यक्ती शर्ट आणि पँट न लावता घराबाहेर पडूच शकणार नाही.रितेश मृतावस्थेत आढळून आला त्यावेळेस शर्ट आणि पँट लावलेला नसल्याने शंका-कुशंका निर्माण झाली आहे.सदर घटनेचा तपास गडचिरोली पोलिस ठाण्याचे ठाणेदार अरुण फेगडे यांच्या मार्गदर्शनाखाली गडचिरोली पोलिस करीत आहेत.
