उद्रेक न्युज वृत्त
चंद्रपूर (मूल) :-मूल तालुक्यातील चितेगाव येथील युवा शेतकरी महेश तोडासे यांच्या सोबत चित्तथरारक घटना काल २२ फेब्रुवारी रोजी सकाळच्या सुमारास घडली.महेश नेहमीप्रमाणे आपल्या शेतात सकाळी लाखोरी खोदण्यासाठी जात असतांना दबा धरून बसलेल्या वाघाने त्याच्यावर झडप घातली व जखमी केले.वाटेत सोबतीला कुणीच नव्हते;समोर फक्त वाघ असल्याने महेशने कसेबसे स्वतःला सावरले आणि वाघाला दूर सारत क्षणाचाही विलंब न करता जवळच असलेल्या झाडावर चढल्याने तो सुदैवाने थोडक्यात बचावला.डोळ्यासमोर मृत्यू पाहून त्यावर त्याने विजय मिळविला.प्रसंगावधान साधून जखमी झालेल्या महेशने काही वेळाने वाघ निघून गेल्यावर झाडावरून खाली उतरून गावात आपबिती सांगितली.जखमी महेशला उपजिल्हा रुग्णालयात उपचारासाठी दाखल करण्यात आले.उपजिल्हा रुग्णालयात महेश यांच्यावर प्राथमिक उपचार करण्यात आले.
मूल तालुक्यात वन्य प्राण्यांच्या हल्ला करण्याच्या घटना वाढतच चालल्या असल्याने यावर तातडीने उपाययोजना करण्यात याव्या; अशी मागणी शेतकरी बांधव व परिसरातील नागरिकांनी केली आहे.
