उद्रेक न्युज वृत्त
मूल(चंद्रपूर) :- मूल पंचायत समिती अंतर्गत येणाऱ्या केळझर ग्रामपंचायतीच्या महिला सदस्याने पतीच्या नावे मंजूर असलेल्या घरकुलाचे बांधकाम करण्यासाठी पंचायत समिती कार्यालयात एका जागेचे नमुना ८ सादर केले आणि बांधकाम मात्र भलत्याच जागेवर करीत असल्याचा प्रकार उघडकीस आला आहे.
महिला सदस्याने सदस्य पदाचा गैरवापर करून शासनाची दिशाभूल केली आहे.त्यामुळे चौकशी करून संबंधितावर कारवाई करण्यात यावी; अशी मागणी सोहील मानकर यांनी गटविकास अधिकारी यांच्याकडे निवेदनातून केली आहे.त्यामुळे घरकुल विभागात एकच खळबळ माजली आहे.
यशवंतराव चव्हाण विमुक्त जाती व भटक्या जमाती घरकुल योजनेअंतर्गत दिलीप श्रावण मराठे यांना सन २०२३-२४ मध्ये घरकुल मंजूर झाले.घरकुलाच्या बांधकामासाठी त्यांच्या मालकी हक्काचे ग्रामपंचायत नमुना ८ ला मालमत्ता क्रमांक- ७७८ क्रमांकाचे नमुना ८ पंचायत समितीच्या घरकुल विभागात सादर केले. शासनाच्या नियमानुसार ज्या जागेचे कागदपत्र सादर केले,त्याच जागेवर घरकुलाचे बांधकाम करणे गरजेचे होते.मात्र,त्यांच्या पत्नी वैशाली दिलीप मराठे या ग्रामपंचायत सदस्य असल्याने आमचे कोण काय बिघडवणार? या आविर्भावात पतीच्या नावे असलेल्या जागेवर घरकुलाचे बांधकाम न करता शासकीय जागेवर अतिक्रमण करून बांधकाम करीत आहेत. वैशाली मराठे यांनी ग्रामपंचायत सदस्य पदाचा दुरूपयोग करून शासनाची दिशाभूल केली आहे. त्यामुळे या प्रकरणाची चौकशी करून त्यांना सदस्य पदावरून अपात्र करण्यात यावे; अशी मागणी सोहील मानकर यांनी निवेदनातून केली आहे.प्रकरणाची चौकशी करून कार्यवाही न केल्यास पंचायत समिती कार्यालयासमोर आंदोलन करण्याचा इशाराही निवेदनातून दिला आहे.
घरकुल मंजूर झाल्यावर बांधकाम करण्यासाठी कार्यालयात सादर केलेल्या नमुना ८ वर संबंधित गृहनिर्माण अभियंत्यांनी बांधकामाचे लेआऊट देणे गरजेचे असते.मात्र गृहनिर्माण अभियंते कार्यालयातच बसून कारभार हाकतात.लाभार्थी आपल्या मर्जीने लेआऊट देऊन बांधकाम करीत असल्याने असे प्रकार घडत आहेत.त्यामुळे गृहनिर्माण अभियंत्याच्या कार्यप्रणालीवर प्रश्नचिन्ह निर्माण होत आहे.
