उद्रेक न्युज वृत्त
देसाईगंज(गडचिरोली) :- भारतरत्न डॉ बाबासाहेब आंबेडकर यांनी शिक्षणासाठी नेहमीच आग्रह धरला. ‘शिक्षण हे वाघिणीचे दूध आहे’; ते जो कुणी प्राशन करेल; असा व्यक्ती वाघिनिसारखे गुरगुरल्या शिवाय राहणार नाही.शिक्षणाची कास धरून प्रगती करा; असा संदेश त्यांनी दिला.डॉ बाबासाहेब आंबेडकर यांच्या जयंतीदिनी,महापरिनिर्वाणदिनी,धम्मचक्र प्रवर्तनदिनी लाखोंच्या संख्येने पुस्तकांची खरेदी-विक्री होते.याच उद्देशाने फेस ऑफ आंबेडकराईट मुव्हमेंट (फॅम)द्वारे शिक्षणाचे महत्त्व तळागाळापर्यंत पोहचवण्यासाठी मुंबईसह राज्यभर “एक वही एक पेन अभियान” राबवले जात आहे.डॉ.बाबासाहेब आंबेडकर यांच्या महापरिनिर्वाण दिनानिमित्त देसाईगंज (वडसा) शहरामध्ये मोठ्या संख्येने जनसमुदाय दीक्षाभूमी येथे अभिवादन करण्यासाठी येतात.यावेळी बाबासाहेबांना अभिवादन करण्यासाठी फुले,माळ आणि मेणबत्ती आणली जाते; मात्र फॅमच्या वतीने या वर्षी “एक वही एक पेन अभियान” सुरू करण्यात आले आहे.सनोज खोब्रागडे,प्रतिक लाडे, मयंक मेश्राम,विक्की राऊत,तुषार राहाटे,आतिश राहाटे,सुमेध मेश्राम,हर्ष माटे,रोहित जनबंधू,मोहितेश शिंपोलकर या युवा विद्यार्थ्यानी हे उपक्रम राबवले असून या उपक्रमाच्या माध्यमातून गोळा करण्यात आलेले वही पेन दिनांक-३ जानेवारी २०२४ रोजी क्रांतिज्योती सावित्रीबाई फुले आणि १२ जानेवारी २०२४ रोजी राजमाता जिजाऊ यांच्या जयंतीनिमित्त दुर्गम भागातील गरजू विद्यार्थ्यांना वाटप केले जाणार आहे.
