जावई-सासऱ्याची लढाई; बेदम मारहाणीत सासऱ्याचा मृत्यू.. – अहेरी तालुक्यातील घटना..

गडचिरोली :-जिल्ह्याच्या अहेरी तालुक्यातील महागाव येथे एक धक्कादायक घटना उघडकीस आली आहे. जावई आणि मुलगी बऱ्याच दिवसांपासून घरी वास्तव्यास राहायला आल्याने ‘तुम्ही इथे कशाला आले?’ असे म्हणीत दारूच्या नशेत सासऱ्याने वाद घातल्याने जावयाने सासऱ्याला बेदम मारहाण केली. झालेल्या मारहाणीत सासऱ्याचा मृत्यू झाला.मारहाणीत मृत्यू झालेल्या सासऱ्याचे नाव रमेश पोचम दुर्गे वय ५५ वर्षे रा.महागाव असे असून चंद्रशेखर हिरालाल पवार वय २५ रा.चितापूर तांडा,जिल्हा गुलबर्ग (कर्नाटक) असे आरोपी जावयाचे नाव आहे. सदरची घटना ही काल शनिवारी रात्रीच्या सुमारास घडली असून आज,रविवार १५ जून रोजी उघडकीस आली.घटनेनंतर आरोपी जावयास अहेरी पोलिसांनी अटक केली आहे.

मयत रमेश दुर्गे हा दारूच्या आहारी गेला होता. यापूर्वीही त्याने पत्नीशी वाद घातल्याने त्याच्यावर पोलीस ठाण्यात गुन्हा दाखल होता.अश्यातच काल शनिवारी तो दारू पिऊन घरी गेला असता त्याने दारूच्या नशेत जावई चंद्रशेखर पवार सोबत वाद घातला.त्यातच दोघांमध्ये कडाक्याचे भांडण झाले. रागाच्या भरात चंद्रशेखर पवार याने सासऱ्याला बेदम मारहाण केली.यात रमेश दुर्गेचा मृत्यू झाला.प्रकरणी अहेरी पोलिसांनी घटनास्थळ गाठत आरोपी जावयास अटक करून पुढील तपास सुरू केला आहे.