जंगली हत्तींचा धानोरा तालुक्यात धुडगूस; जिवाच्या आकांताने पळापळी..!

गडचिरोली :-कधी आरमोरी तालुका तर कधी देसाईगंज,गडचिरोली,कुरखेडा व इतर तालुक्यात उच्छाद मांडणाऱ्या जंगली हत्तींनी मोर्चा वळवून आता धानोरा तालुक्यात धुडगूस घालत नागरिकांच्या घरांसह जीवनावश्यक वस्तू व पिकांचे नुकसान केले आहे.झुंडात असलेल्या एका हत्तीने शुक्रवार २५ जुलैच्या रात्री धानोराच्या बेलगावात एंट्री करताच गावातील नागरिक भयभीत होऊन जिवाच्या आकांताने सैरभैर पळू लागले.कुणी घराच्या छतावर चढले तर कुणी आदळून-आपटत गावात ‘हत्ती आला रे’ असे म्हणून धूम ठोकली.हत्तीने पवन इंदलसिंग धालनिया यांच्या घराचे छप्पर पाडले,त्यानंतर महेंद्र प्यारेलाल लेडिया यांच्या घराला लक्ष्य केले.घराजवळ ठेवलेले तांदूळ,बिजाई धानाची नासधूस केली. गावातील शिवराज आणि शिवनाथ गावर,पोलिस पाटील संतोष मालिया यांच्या परसबागेतील केळीच्या बागेतही हत्तीने नुकसान केले.छतावर चढलेल्या नागरिकांनी आरडाओरड केली,तसेच हत्तीच्या दिशेने बॅटरी चमकावून हुसकावण्याचा प्रयत्न केला,पण हत्तीने आपलीच खरी करून मोठ्या प्रमाणावर नागरिकांची नुकसान केली. प्रसंगी गावात हुल्ला पथकाची टीम पोहचताच हत्तीला रात्रीतूनच जंगलात पिटाळून लावले.मात्र,रात्री गावात एंट्री केलेल्या हत्तीने काहीकाळ नागरिकांची झोप उडवून सोडली होती.