जंगली हत्तींचा कळप पोर्ला वनपरिक्षेत्राच्या नवरगाव परिसरात; गावकरी भयभीत..

गडचिरोली :-वडसा वन विभाग अंतर्गत येणाऱ्या पोर्ला वनपरिक्षेत्र प्रादेशिक कार्यालयाच्या नवरगाव जंगल परिसरासह अगदी गावशेजारी जंगली हत्तींचा कळप आज,मंगळवार ११ फेब्रुवारीला सायंकाळी ७ ते ८ वाजेच्या दरम्यान आढळून आल्याने परिसरातील नागरिक भयभीत झाले आहेत.सदर कळपात १० ते १२ जंगली हत्ती असल्याची माहिती आहे.

मिळालेल्या माहितीनुसार,सायंकाळच्या सुमारास पोर्ला वरून नवरगाव ला जाणाऱ्या एका व्यक्तीला १० ते १२ जंगली हत्तींचा कळप गावशेजारी जातांना दिसून आला.त्यामुळे सदर व्यक्तीने याबाबत गावकऱ्यांना माहिती दिली.गावकऱ्यांनी जंगली हत्तींना पळविण्यासाठी फटाके फोडून पळविण्याचा प्रयत्न केला.त्यातच जंगली हत्तींचा कळप जंगल परिसरात अजूनही ठाण मांडून असल्याची माहिती आहे.काही नागरिकांनी घटनेबाबत पोर्ला वनपरिक्षेत्राचे वनपरिक्षेत्र अधिकारी मडावी यांना घटना घडताच माहिती देऊनही घटनास्थळी दाखल न झाल्याने गावकऱ्यांनी काहीकाळ संताप व्यक्त केला. जंगली हत्तींचा कळप मौशीखांब-बेलगाव जंगल परिसरातून नवरगाव जंगल परिसरात दाखल झाल्याने परिसरातील नागरिक भयभीत झाले आहेत.जंगली हत्तींचा तात्काळ बंदोबस्त करावा; अशी मागणी परिसरातील नागरिकांनी केली आहे.