चारित्र्यावर संशय घेणाऱ्या पतीचा चक्क पत्नीनेच काढला काटा..!

पुणे :-ऑटोमोटिव्ह,आयटी आणि उत्पादन उद्योगासाठी प्रसिद्ध असलेल्या पिंपरी-चिंचवड शहरात आज,शुक्रवार २४ ऑक्टोंबरच्या पहाटे धक्कादायक घटना उघडकीस आली आहे.पतीच्या सततच्या चारित्र्याच्या संशयाला कंटाळून चक्क पत्नीनेच पतीचा काटा काढून गळा आवळून हत्या केल्याचे उघड झाले आहे.प्रकरणी २८ वर्षीय आरोपी पत्नीस चिंचवड पोलिसांनी अटक करून खुनाचा गुन्हा दाखल केला आहे.चैताली नकुल भोईर वय २८ वर्षे,रा.भोईर कॉलनी,चिंचवड असे आरोपी पत्नीचे नाव असून नकुल आनंद भोईर वय ४० वर्षे असे हत्या झालेल्या पतीचे नाव आहे.सदरची घटना आज शुक्रवारी पहाटे तीन वाजताच्या सुमारास माणिक कॉलनीतील महानगरपालिकेच्या आरोग्य कार्यालयाच्या इमारतीत घडली.पती-पत्नीमध्ये काही दिवसांपासून वाद सुरु होता. नकुल हा पत्नी चैतालीच्या चारित्र्यावर नेहमी संशय घेऊन वाद घालायचा.आज पहाटेच्या सुमारास दोघांमध्ये कडाक्याचे भांडण झाले.भांडण सुरू असतांनाच चैताली हिने रागाच्या भरात पती नकुल भोईर यांचा कापडाने गळा आवळून खून केला.घटनेची माहिती मिळताच पोलिसांनी चैताली भोईरला तात्काळ ताब्यात घेत प्रकरणाचा पुढील तपास सुरू केला आहे.नकुल भोईर हे सामाजिक कार्यकर्ते होते.दोघेही साडी सेंटरचा व्यवसाय करायचे.आगामी स्थानिक स्वराज्य संस्थांच्या निवडणुकीत पत्नीला नगरसेवक बनविण्याची त्यांची इच्छा होती.पण,क्षुल्लकशा कारणासाठी जीव गमावावा लागला.त्यांना ५ वर्षीय आणि २ वर्षीय दोन चिमुकले असून इकडे आई कारावासात जाणार तर वडील कायमचे सोडून गेल्याने दोन्ही मुले आई-वडिलांविना पोरकी झाली.